معنى كلمة السفيه؟؟

انا بس بعرف شلون ثبت عنده انه اغلبيه الشعب الكويتي متدين ؟ وشنو مقياس التدين أساسا ؟ وشنو مقياس التحرر ؟ وهل امتلاء

المساجد ظاهره غريبه على المجتمع الكويتي ؟ هل التزام الاغلبيه بقراءة القرآن والصيام اصبح شي غريب على

الكويتيين ؟؟ ويا أخي منو قالك انه العلماني او الليبرالي واللي يطالب بتطبيق الدستور والمجتمع المدني والحريات واحترام حريه الرأي والمساواه انه الانسان غير متدين او مسلم ؟؟

يعني مثلا ما اعتقد انه التدين كلمه معناها ومقياسها ثابت عند الكل ... بل تختلف هذه المعايير والمقاييس من شخص الى اخر .. واخذوا على هذه الكلمات مثل كلمه السفيه ... يعني مثلا بنظري انا انه ليس الشخص المنحط اخلاقيا او مثل ما نقول المنفلت او ابسطها شوي لكم المغازلجي او حتى اللي يصدر منه موقف بمكان عام منافي للاداب .. يقولون عنه سفيه ..

اعتقد انه السفيه هو الذي يلبس عباءة الشكل الديني المزيف من لحيه وغتره بدون عقال ودشداشه قصيره لأمور دنيويه وشخصيه ويطلع بقناة صاحبها هو احد سراق المال العام وياخذ راتب منه ويفتح بيته ويوكل عياله من مال مشبوه ويتلفظ بألفاظ غير لائقه وبعد يطلع لنا بالتلفزيون ويقول قال الله وقال الرسول ..... اعتقد بعد كل هذا عرفنه الحين منو السفيه ؟؟

عيدكم مبارك ... وراح نتواصل بعد العيد

تقبل الله طاعتكم .... وعيدكم مبارك

دعوه

يسرنا دعوتكم لزيارتنا في معرض ابداعاتي

بقاعة الموفنبيك في المنطقة الحرة في الفتره مابين

18-20 سبتمبر

وسيتم الافتتاح يوم الخميس الموافق 18-9-2008م

في تمام الساعة 8:30 مساءا

حضوركم دعما لنا

تجمع صوت الكويت

http://www.soutalkuwait.com

It is our great pleasure to invite you to visit us at the exhibition “Ebda3aty” at the Movenpick hotel in the Free zone Area.Date: 18-20 September 2008 Opening Day 18th at 8:30pm Your attendance is our greatest support

Sout Al Kuwait

الحكومه الاصلاحيه

مساء الخير ...
من اول ما مسك الشيخ ناصر رئاسة الحكومه واحنا نسمع انه حكومته اصلاحيه وانه هو رجل اصلاحي وطبعا هذا كلام اغلبيه النواب ... الكويتي لي الحين ينطر البيت ما بين 12 لي 15 سنه ولما يطلعله البيت ينطر بعد 5 سنوات ثانيه لما تييله الخدمات بالمنطقه من مدارس وشوارع وافرع جمعيات وافرع بنوك وتلفون وماي ... وغيره وغيره ... وطبعا هذا غير قيمه القرض علشان يبني القسيمه لانه ال 70 الف ما توفي ومواد البناء بارتفاع دائم .. يعني تقريبا نقدر نقول بحسبه بسيطه الواحد لو يتزوج وعمره 25 ... لي سن ال 40 يطلعله بيت ويبيله تقريبا باحسن الأحوال عشر سنوات ثانيه يسدد قرضه .. يوصل لسن ال 50 سنه .. والحمدلله ما بقاله شي على التقاعد او الدفان ....
بس الحمدلله ما زالت الحكومه اصلاحيه ورئيس الوزراء اصلاحي ...
الصحه ومستشفياتنا الحلوه ... مباني جميله وشبرات متطوره ودكاتره ولا اروع ... طبعا مو الكل بالنسبه للدكاتره .. بس عطوني اخر مستشفى متى انبنى ؟؟؟
وشنو وضع خدماتنه الطبيه؟؟ عندنا اجهزه متطوره والله ادري بس روحوا المستشفيات وشوفوا الغبار اللي على الاجهزه ؟؟ ما عندنا فنيين متخصيين ؟؟ ما اعتقد .. ما عندنا فلوس نييب من بره ؟؟؟ ما اعتقد .. ما عندنا ميزانيه تييب دكاتره متخصصين وعلى مستوى راقي ؟؟؟ هم ما اعتقد
ولما الحكومه الأصلاحيه نوت تبنى مستشفى جابر ... يابوا وسائل الاعلام والأمير طال عمره يابووه وقص الشريط وحط حجر الأساس وشفنه المخطط مال المستشفى جنه شي غريب بصير بالديره .. والله عيب ..

بس هم الحمدلله الحكومه مازالت اصلاحيه ورئيس الوزراء اصلاحي ...
شوارع زحمه وازمه مروريه واحنا تونه مليون نسمه .. تجار اقامات وعماله زائده موجوده بالشوارع وتفشي الجرائم ... والتعليم اصبح بالنازل ومخرجات التعليم مستواها هابط ... بطاله للكويتيين والواحد الحين لازم ينطر الوظيفه .. الرواتب مقارنه بغلاء الأسعار اصبحت ما توفي بس الحمدلله باقر حلها بالمعكرونه والدياي .. زياده الفتنه الدينيه الموجوده بين السنه والشيعه ...المشاكل الاجتماعيه عديده ... الفن هابط ... الرياضه بالحضيض ...

بس الحمدلله مازالت الحكومه اصلاحيه ورئيس الوزارء اصلاحي ..
شنو بقى لنه يا ناس ...؟؟

بس هم اقول هالمره .. يا دارنا اللي ما نبي غيرها دار .. يا كويت

وزير النفط + وزير الشؤؤون = حكومه رشيده

بدا رمضان من قبل 4 ايام تقريبا ... يعني اقدر اقول انه الحين الجسم بدا شوي يتقبل الوضع والعقل بدا يستوعب وياخذ وضعه الطبيعي بالتفكير ..
واضف الى ذلك ايضا اني مصاب بزكام خفيف وحرقه بالبلاعيم تخليني اكح وايد .. بس ودي اكتب عن جم شغله ادري انه اغلب الزملاء اكتبوا عنها ..
الموسم السياسي على وشك البدء , وما ادري ليش حاس انه راح يكون موسم سياسي ساخن وفي مفاجآت مع انه اغلب الناس باعتقادهم انه المجلس والحكومه سمن على عسل بس اللي نشوفه بالجرايد حركات سينمائيه لزوم التشويق بس

..
الكل سولف عن المصفاه الرابعه والموضوع صار له اكثر من اسبوعين بالجرايد ... يعني الحين كل البوق اللي صار بالديره وقفت على بوقت المصفاه الرابعه والمستفيدين منها ؟؟؟ شمعنه ؟؟ وبعدين السالفه تحولت حق سلف وتيار وطنى واخوان وهذا من ربعنه وما يصير نخلييه ..بس والله العليم داهيه يا اخوان ... يعني سالفه ترشيد وال 10 ملاين دينار وسالفه المصفاه الرابعه ... الحكومه فعلا عرفت تختار

..
ووزير الشؤؤون ما شاء الله عليه يقول وواثق من نفسه.... ايقاف النشاط الرياضي دوليا راح يكون مؤقت يعني شهرين بس لا تحاتون ... خل الرياضه الكويتيه نطقها بالطوفه وخل عيالنا يولون وخل نصير اضحووكه جدام الناس بس هم لا تخافون راح يكون الايقاف مؤقت يا جماعه وراح تعود الرياضه الكويتيه مره اخري للعالميه وراح نشوف ونسمع عن اجازاتنا اللي ما راح تصير الحين بس خل يوقفونه دوليا اول شي .. شفيكم مو مصدقين ؟؟؟ شوفوا ويه وزير الشؤؤون واحلب لبن

....
وخل نييه خل النائب المليفي ... ما ادري يا اخي بس مو دفاعا عن رئيس الحكومه بس جنه شويه مصختها يا اخي .. حاط دوبك دوب رئيس الحكومه ما ادري ليش ما تشتهيه كلش .. من المجلس اللي طاف وحملتك الانتخابيه الاخيره للمجلس الحالي والحين ... ليش ؟؟؟ في شي بينك وبينه مو متفقين عليه؟؟؟

تحيه للكل

مبارك عليكم الشهر وكل عام والجميع بخير

ذيل الجلب ... ولحية نبيل

ما ادري ليش شدتني الصوره هذي وايد ... مع انه العلاقه بين الجلب والقطوه عدائيه جدا مثل ما نعرف .. بس شوفوا الأثنين البرد ذابحهم فلموا بعض علشان يتدفون .... حتى الحيوانات اللي تكن لبعض العداء تتآلف مع بعضها البعض وقت الشده .. واحنا بالكويت هني نتشمت ببعض وحتى الحب صار عمله نادره بالزمن هذا ... غريب امر الأنسان والله ... واترك لكم التعليق

اول مره اشوف واحد يمدح برنامج هو بقدمه ... وطبعا اقصد نبيل العوضي ... ويمدح الشيخ ماله ولي نعمته خليفه بارك الله فيه وحرصه على برنامج السيره النبويه اللي نبيل بقدمه برمضان .. وحرص مدير القناه بارك الله فيه بعد احمد الدوغجي على توفير الأمكانات المتاحه .... يا اخي بالديره هذي اللحيه صارت وسيله للوصول والثراء الفاحش ... خليفه حرامي والدوغجي مخرج احلى فيديو كليبات فيهم بنات ورقص ولبس مو طبيعي بس الحمدلله هم حريصين على برنامج السيره النبويه ... يا سبحان الله.. صج .... الجلب يحب العظمه حتى لو عطيته لحم ....

الحسناء المغربيه وهفهف

ماشاء الله ... كل ما أقول بس ما ابي اكتب عن بعض النواب مثل هفهف اخاف يقولون عني ليش حاط عليه ومتحامل وشدعوه ومن هالكلام يفاجئني بطلبات واقتراحات عجيبه للوزراء .. واخرها هجومه على الكليه الأكاديميه الأمنيه التابعه لوزاره الداخليه ومطالبته بتدريس المواد الاسلاميه ونظام الحسبه وطاعه ولي الأمر والشريعه والفقه ومن الأمور هذي .

تكفه يا هفهف ليش ما تطالب ديوان الخدمه المدنيه انه على كل واحد يبي يقدم على الوظيفه الحكوميه لازم يكون دارس فقه وشريعه بعد ؟؟ الكليه الأمنيه اشدخله بالفقه والشريعه ونظام الحسبه ؟؟ ضباط راح يتخرجون برتب مختلفه وعملهم في السلك العسكري ليش يتعلمون ويدرسون فقه وشريعه ؟؟؟ ليييييييش؟؟؟

*******************************************************

وطبعا الأمر ما يخلى لازم بعد يتحفنا الحربش باقتراح عن تخيير المجرم اذا يبي يتعاقب بتعاليم الدين او القوانين المدنيه ..!!!! حبيبي انته والله يعني لو القاضي يسأل حرامي شنو تبي سجن سنتين ولا نقطع ايدك ,, تعتقد يالحربش شنو راح يختار الحرامي ؟؟ يعني انسان مؤمن وصالح وسوي مثل هالحرامي لازم يختار قطع اليد ,, حتى الدين صار عندكم لعب واختيار ؟؟ والله كل ما نعيش بالديره هذي نشوف منكم العجب

**********************************************************

امس رديت من دبي وكان عندي شغل يومين فقط .. كل ما اروح دبي اشوف ديره ثانيه .. غير مع انه روحاتي كل سنه وساعات مرتين او 3 مرات بالسنه .. بس الاقي في تغيير وتطور بالديره هذي .. ما اقول الا حسافه يا كويت وعليج بالعافيه يا دبي

***********************************************************

طبعا الأمر ما يخلى .. اخر ليله هناك رحت سهره بفندق .... وطبعا سهره بريئه كانت .. المهم المطرب العراقي كان يشدو بالأغاني العراقيه الجميله والماجدات العراقيات بسن الربيع يتمايلن جدامي طربا ومغنى .. وانا كنت قاعد والطرب ماخذني بعيد وانفخ بالشيشه الطيبه واتذوق حبيبات العنب الأحمر والرقي البارد مع كأس من الرد بول الصافي بدون اضافات والحمدلله .. تفاجأت واذا بحسناء مغربيه كانت جالسه بالطاوله اللي يمي وكانت جميله جدا .. تسألني ..

الحسناء المغربيه : مساء الخير

أنا : مساء الورد

الحسناء المغربيه : انته كويتي ؟؟

أنا : اي نعم

الحسناء المغربيه : عرفت انك كويتي علطول

أنا : وشلون عرفتي؟؟؟

الحسناء المغربيه : علشان انته برشه نظيف واحلاهم بالصاله

أنا : شكرا عيونج اللي حلوه

طبعا اخر جمله قلتها مع ابتسامه حياء وخجل .. وطبعا صابني غرور شوي وقلت بقلبي يا حلونا يالكويتيين .. والله ملح الخليج احنا وين ما نروح نلفت الأنظار

وطبعا طلعت من السهره الساعه 3 الفجر ورحت فندقي ونمت وثاني يوم رديت الديره علشان انسى الحسناء المغربيه واجابل هفهف وربعه

شنو انجازاتنا ؟؟؟

مر تقريبا 11يوم على تاريخ 2-8 , وهو ذكرى الغزو للوطن الجميل ... ودي اسال سؤال , شنو انجازاتنا وشنو سوينا من التحرير لي يومنه هذا ؟؟ يعني ما يقارب 17 سنه

الجواب ببساطه .. ولا شي , نعم تنقصنا وايد اشياء لو نتكلم من ناحيه انجازاتنه الملموسه , شوارعنا لي الحين نفس الشي مشكله زحمه ومشكله المرور صار لها 10 سنوات ولا يي شهر رمضان صج تلوع جبدك و الأسكان ازدادت صعوبه , الأراضي على مد النظر عندنا وكل سنه فائض الميزانيه بازدياد وقعد نشوف ارقام قياسيه اللهم لا حسد ولي الحين ننطر البيت من 12 لي 15 سنه , البوق صار اشكره عيني عينك ومن ناس المفروض اهي اللي تحمي المال العام وتكون مسؤوله وقدوه , الصحه عندنا في تدهور من حيث الخدمات والمستشفيات اللي والله تفشل لدرجه قمنا نرسل علاج بالخارج لدول مثل مصر والأمارات والسعوديه بعد ماكانوا اهم ييون عندنا يتعالجون , التعليم حدث ولا حرج من كادر تعليمي رخيص ومخرجات هشه وقمنا نروح لأفقر دول الخليج وندرس عندهم , وصار عندنا مشكله يديده وهي البطاله وانتظار الوظيفه للكويتي , اقتصاد مبني على مصدر واحد وهو النفط فقط هذا غير مشاكل العماله الزائده بالبلد واللي مالها داعي بس تنفيع افراد بشركات وهميه واحنا ما نتكلم على اي فرد نتكلم عن اسامي معروفه من تجار الأقامات
طبعا لو نتكلم على مستوى الأجتماعي , للأسف الطائفيه اصبحت اشد واقوى من قبل الغزو التطرف الديني وظهور الجماعات الدينيه المتطرفه واللي مالها حسيب ولا رقيب اصبحت عاديه جدا وفوق هذا انعدام الوعي الثقافي للفرد , وايد اشياء والله لو تكلمنه عنها ما نخلص من مشاكل وهموم

موحرام ديره نفس الكويت مبنيه على حب اهلها لبعض , وترابط شعب اصيل يحب الأرض هذي وعنده كتاب اسمه الدستور الكويتي اللي اقسم بالله انه باجي شعوب دول المنطقه تحسدنا عليه وعندنا ديمقراطيه نفتخر فيها ينقصنا اهم شي وهو احترام الرأى مهما كان , سنه وشيعه وتيار ديني وتيار لبرالي وبدو وحضر ,,, تقسيمات للمجتمع ماكنه نشوفها بزمان اول حتى لو كانت موجوده ما كنا نحس فيها .... خلونا نشوف ارض مشتركه نبني عليها ونساعد انفسنا على تجاوز الأمور التافهه وحل المشاكل ... لبناء وطن جميل ,,,, تقدرون؟؟؟


طبعا اخر صرعات التيار المتطرف عندنا من اعضاء مجلس الأمه الأشاوس هو .. بعض الألعاب الأولمبيه المقامه في بكين تحتوي على مناظر مخله وغير لائقه ولا تناسب مجتمعنا , لا سيما ان ملابس اللاعبات تخالف الذوق ويتحرج منها الأنسان ,,, طبعا هذي نصيحه قدمها النائبين حسن الكندري والعمير لوزير الأعلام ....

والله عيييييب عليكم بسكم تخلف وتطرف وامور تافهه ,,,, شوفوا مصلحه البلد احسن ... هذي نصيحتي لكم

مشغووووول وحياتي مشغووول

ادري من زمان ما كتبت شي وودي اكتب , ديرتنا ما تخلى بس والله مشغول وايد وان شاء الله اسبوع وراح ارد واكتب واطلع اللي فيني :)

مشكورين على كل من دزلي ايميل وسأل عني والف شكر