للتاريخ .. وللكويت

رد علشان الكل يفهم .. وخاصة البلابل

بدايه اود اناشد الكل بالحضور لاعتصام يوم الاثنين بساحة الاراده تحت عنوان نبيها علنيه

وثاني شي ردا على جريده القبس احنه ما نتبع احد ياناس ومالنه شغل بالحركه الدستوريه ولا غيرها من الحركات تكفوون فهموا شوي

اكرر واقول .. اعرف عن نفسي .. شخص على باب الله مديون بقرض افكاري ليبراليه واموت على حقوق الانسان واناشد بتكوين دوله مدنيه 100% واتمنى حذف منهج التربيه الاسلاميه وتدريس القرآن فقط واتمنى اشوف وزير كويتي مسيحي او نائب كويتي مسيحي وما عندي مانع ببناء كنائس حتى لو كان يم بيتي اللي راح ابنييه بعد عشرين سنه .. ما اعتقد بعد كل هذا انتمي للحركه الدستوريه واكون من كوادرها والعياذ بالله .. اللي يبي يفهم يفهم .. واللي ما يبي نفس حنطفيس وبلابل علي الراشد كيفه

وهذا رد الحمله على جريدة القبس وشكرا

http://ourroleq8.blogspot.com/2009/12/blog-post.html

مغلق

نعم فنحن لا نتبع حزب ولا طائفة معينه .. نحن نتبع الكويت

ما نسكر حلوجنا

مو احنا اللي نسكر حلوجنا عن قول الحق .. وطول ما فيه دستور .. في راي حر

نوابنا الاشاوس ... اكرر اللي يحملون الرايه الوطنيه ويحملون راية نبيها مدنيه ويحملون راية الديمقراطيه وحريه الراي

لي متى انتوا ساكتين ؟؟

حريه راي

ندوة امس كانت الفعالية الاولى لحملة ارحل نستحق الافضل وحضر الندوة ما يقارب ال 250 شخص وباعتقادي انها بدايه طيبه للحمله ... من زمان ما شفنه تجمع القوى السياسيه بالكويت في ندوة لها مضمون محدد واتفاق تلك الكتل لهذا المضمون

بس اللي ضحكني جريده الدار والتعليق على الخبر .. حيث انه عندها مصدر حكومي وصف المطالبه هذي بالغباء السياسي ... وضعف حجم الاستجواب المقدم لرئيس مجلس الوزراء .. بس ما ذكر المصدر هذا للاسف هل يستطيع سموه اعتلاء المنصه وانه عنده القدره السياسيه لمواجهة هذا الغباء ؟؟

حتى محامية الحكومه معصومه المبارك قالت انه الشي هذا تعدي صارخ على الدستور .. بسألج يا دكتورة العلوم السياسيه .. يافاهمة .. وين التعدي على الدستور ؟؟ هل ابداء راي معين يعد تعدي صارخ على الدستور ؟؟ اعتقد انه من حقنه التعبير عن راينه وانه اداء سموه سيئ والدليل ترأسه ست حكومات لم تقدم شي للدوله

اتمنى من كل واحد حاس بمدى سوء حال الدوله ومدي تخبط الحكومه انه يملك الشجاعه وينضم لهذي المجموعه ..اثبتنه للكل انه ما في مصلحه وراء هذي الحمله .. ما في تكتل سياسي معين وراء هذي الحمله .. مجموعه من الشباب لهم اختلافات فكريه كبيره بس عملنه على مساحه مشتركه وقضيه الكل متفق عليها وهي بناء دوله ومجتمع ...

سمو رئيس مجلس الوزارء .. على المستوى الشخصي لك كامل التقدير والاحترام , انته بالاخير جزء من المجتمع ولك مكانتك واحترامها .. بس طلبنه واضح .. اذا استمريت بمنصبك فانه الخاسر الاكبر هي الكويت ..

فارحل نحن نستحق الافضل

الفعاليه الأولى : اعتصام في ساحة الارادة

http://ourroleq8.blogspot.com/2009/11/blog-post_15.html

دعوة للمشاركه

http://ourroleq8.blogspot.com/2009/11/blog-post_10.html

طال عمرك .. ارحل

كاالعاده ضربة موجعه يتلقاها سمو رئيس الوزراء .. بظهور صوره من الشيك .. بس العجب انه لي الحين في ناس تدافع وتقول وتعيد .. غريبه هالظاهره ..طبعا انا ما اتكلم عن محامي سموه عماد السيف .. انا اتكلم عن محاميين سموه من اعضاء مجلسنه الموقر .. مجلس الامه .. مجلس الحريات وكلمة الحق ..

ويقولون اذا من ماله الخاص عادي شنو فيها ؟؟ حلوه والله هذي النكته .. من صجكم ؟؟ نوابنه الاشاوس تكفون بدلوا غيروا الحجي هذا .. رولا مو هييك الحكي يا دلي مو هيييك .. علي الراشد .. الزلزله .. عيببب

والبعض يتحجى عن شنو راح تستفيد الكويت من ظهور الشيك الحين .. هل الكويت بحاجه الى تأزيم ثاني ؟؟

اي نحن والكويت بحاجه الى وقف استنزاف المال .. الى تقليل الفساد المالي والاداري ..اكثر من التنميه .. واذا بتحطون التنميه بكفه والدور الرقابي للأعضاء وكشف الفساد بوجه كائن من كان .. فراح نوقف مع الكفه الثانيه وطز بالتنميه اذا بتخلونها شماعه

اتمنى من الملا التصريح بعقل هذي المره .. وتقول رايك بصراحه وبصدق .. تذكر ما من تدعي انك نازل باسم المرحوم سامي المنيس وانك المحافظ على كرسيه .. شراح يكون موقف المرحوم المنيس على القضيه هذي ؟؟ هل راح يسكت ؟؟

اسيل العوضي بنظري انتي ليلحين محافظه على اداء متزن .. واتمنى انج تواصلين ادائج هذا بقول الصدق والدفاع عن المال ..

يا ناس مو مهم منو مقدم الاستجواب او القضيه .. مو مهم شنو انتماءه الفكري .. مو مهم عنده لحيه او ما عنده .. المهم .. انه يتبنى قضيه عامه تهمنه .. اقولها للمره المليون , خلوا خلافاتنه الفكريه وخل نطالب برئيس حكومه على قد المسؤوليه .. اعتقد انه سمو الأمير له الحق المطلق باختيار رئيس الحكومه .. واحنه لنا ايضا الحق المطلق بمحاسبة هذا الرئيس والمطالبه بتغييره

سمو رئيس مجلس الوزراء .. طال عمرك .... ايضا كافي .. وارحل

سموك .. طال عمرك .. كافي

اضم صوتي لصوت الزملاء لانه آن الأوان لرحيل ناصر المحمد .. والتحرك لازم يكون بتأني وخطوات مدروسه وجريئه ..

توقعت الهجوم اللي راح يكون على هذي الحمله .. من قبل الصحف الفداويه لسموه .. والزميل العزيز الطارق سبقني بالشي هذا وانكشفت اولى جرائد سموه .. الدار للأخ (م.ح) الي كان بالكويت بالستينات وكان رجل عصامي ما شاء الله.. من حمالي عنده تكتك الى تاجر كويتي ومليونير .. سهاااله السالفه ترا .... اتمنى من جريدة الدار انها تكف عن الحمله وتخليها بعيد عن الموضوع اللي شأنه كويتي مئه بالمئه .. واحذرك عندي استعداد للدخول بالامور الشخصيه جدا جدا أخ م.ح

اتمنى انه لازم ننسى اختلافاتنه الفكريه ونتحد لمصلحه الكويت .. لانه بس كافي .. الامور وصلت لحد لا يطاق

سموك كافي ... طال عمرك كافي ..

ما راح نسكت ..

صج لو نسأل اللي بعقولهم مرض .. ويقولون ليش مكبرين موضوع الحجاب وفتوى الاوقاف .. وليش اصحاب العقول الغير اسلاميه والمتحرره واقفه ضد الفتوى وتصريح جمعية النكاح .. عفوا الاصلاح بالاتزام بفتوى الاوقاف .. انتوا ليش داشين مجلس الامه ؟؟

مجلس الامه يتبع قوانيين وضعيه وليست سماويه .. وليس مجلس تشاوري نفس زمن الصحابه وان كان في اختلاف وخلاف بين المسلمين على ذلك الزمن بطريقه الولايه .. والى الآن .. ليش تنزلون بكل شي فيه انتخابات وتاخذون اصوات من نساء غير محجبات ... بكل مكان تدعسون خلقتكم ليش؟؟ انتخابات جمعيه .. جامعه ... بلدي .. امه .. مدام مو معترفين بالدستور ونصوصه .. ليش تدشون بالامور هذي اصلا ؟؟؟ اكيد مو سالفه دين واسلام .. سالفه سياسه ومنصب وعين على ما بعد المنصب من رئاسة دول وهذا طبعا مخطط الاخوان المسلمين وغيرهم من تفاهات الاحزاب السياسيه الدينيه

بس ارجع واقول الشرهه مو عليكم .. الشرهه على رئيس الحكومه اللي ساكت ليلحين .. سموك طال عمرك ساكت كالعاده وما ادري ليش ؟؟ تردي اوضاع الرياضه وصرنه مطقاقه قلنا ميخالف .. ننطر 20 سنه علشان محكر يسمونه بيت باطراف الديره قلنه ميخالف .. مشاريع تنمويه واقفه وعدم وجود خطه واضحه لانفاق الدخل قلنه ميخالف .. راح يحطونه بصندوق الاجيال القادمه بعد ما ياخذون اللي يبونه ... تترأس ست حكومات فاشله خلال 3 سنوات قلنه ميخالف ما عندنا غيرك بالديره .. رحت دول افريقيه وصورت مع رؤساء دول ما نشوفهم الا بتوم وجيري هم قلنا يالله سياسه خارجيه ما نفهم فيها ...بس لما توصل السالفه للدستور والتطاول عليه .. هني اسمحلي طال عمرك .. ما راح نسكت ... اذا انته ساكت .. احنا لا .. هذا دستور الكويت .. هذي حرياتنه اللي عشنه عليها .. وتعلمنه من اهلنه انه نحافظ عليها ونصونها ... ما راح نسكت .. وسموك اذا انته ساكت .. راح تكون اول خطوات الحل .. هي الماده 102 ...

شعنده غير الكلام ؟؟

كلها جم يوم وراح نبدي الفصل المسرحي من رواية مجلس الامه الكويتي وحكومة ناصر المحمد الرشيده .. قضايا ساخنه راح نشوف ... الللللللله كم كم ... مجلس الامه الكويتي كم كم ...

بدون ... قروض ... صحه ... تربيه وتعليم ... حجاب ... مقاهي وحريات عامه ... تنميه واصلاح ... بوق وعماة عين ... مناهج ... م . ح وافلامه مع م.ع.ج ...

طافت على قضيه المقاهي جم يوم واعتقد الحين هدت النفوس شوي .. وهم قضيه الحجاب وفتوى الاوقاف .. وندوة التحالف بالنزهه .. اللي الصراحه بغيت اروحلها بس للأسف مارحت .. ماكان عندي شي والله بس فكرت فيها شوي .. صحيح كنت راح اسجل موقف واضح لدعم الحريات والدستور والقوانين والمجتمع المدني اللي نطالب فيه .. بس فكرت وبعدين ؟؟؟ شنو راح تقدم لنا هذي الندوات ؟؟؟

اكثر من 30 سنه لما استحوذ التيار الاسلامي السياسي على الديره بجامعتها ومؤسساتها واحنا نسوي الندوات والمناظرات ونتكلم عن الحقوق الموجوده بالدستور وتفعيلها ونتكلم عن مجتمع مدني كامل متكامل لا دخل للاسلام من ناحية الاحكام فيه .. لانه ببساطه ما في دوله بالعالم تستطيع ان تحكم بالشريعه الاسلاميه الصحيحه .... على كثر هذي الندوات والحجي .. نشوف ندوه جماهيريه فيها اشكال غريبه عجيبه نشوفها بس بالاخبار لما يحطون شي عن افغانستان او باكستان يتكلمون عن الفساد والفسق وانه احنا مجتمع محافظ شرقي ووخرنه عن طريج الله وطريج الايمان .. بعدها بيوم نشوف الحكومه تفعل المطلوب .. وتنفذ اللي يبونه !! ليش؟؟؟
الاوقاف اللي عمرها ما تفتي لنا بشي .. قالت الحجاب لبس المرأه الاسلامي والشرعي .. وبعيدن ؟؟ احنا شلنه بالاوقاف؟؟ هل ناخذ تفسير القوانين الدستوريه من الاوقاف ؟؟

السؤال المهم للكل .. شنو بعد الندوات ؟؟؟ راح نتحرك ؟؟ نسوي شي ؟؟ ولا بس كلام وبس ؟؟


تم اكتشاف حاله انفلونزا الخنازير بمدرسه خاصه بمنطقة خيطان .. المدرسه تتبع امبراطوريه الخرافي .. خلوا اليهال يطبون بحمام السباحه وهم عارفين حاله الديره وخوف الناس على عيالهم من هذا المرض وفوق هذا الحين مو وقت سباحه عاد .. وفوق الشي هذا اتصلوا بام البنت وقالولها لا تقولين شي وانتي ليش متكلمه وفاضحتنه ..؟؟!! يا سلام ؟؟ على بو انتوا الخرافي يعني لازم ما نفضحكم ؟؟ ما نتكلم ؟؟ مو كافي تحطون اطفال الهوامير بصف واحد؟؟؟ ما ادري وزاره التربيه مو قادره عليكم ؟؟ اعتقد لا .. اذا الديره بكبرها مو قادره عليكم .. تبون وزاره التربيه ..

الجاسم وعقليته

استغرت فعلا ظهور محمد عبدالقادر الجاسم بالآونه الاخيره كثيرا وفي اكثر من مناسبه .. ففي خلال اسبوع تقريبا شارك في ورشه العمل للمدونيين اللي صارت بالمرينا واللي كنت ناوي اروحلها كمستمع بس بعد اكلت مطبق الزبيدي مع اجار المانجو الهندي وبعدها قلاص كبير من الفيمتو مع الايس .. كانت النومه افضل كثيرا من الذهاب .. وبالامس نظم تجمع صوت الكويت الغير سياسي ندوره حول المحكمه الدستوريه وكان ايضا محمد عبدالقادر الجاسم هو المحاضر ....

ودي اسال سؤال .. ماهي عقليه محمد عبدالقادر الجاسم ؟؟؟ ماهي الاضافات اللي ناخذها من قراءة مقالاته ؟؟ شنو افكاره ؟؟؟ شنو تصوره للدوله الحديثه ؟؟؟

ضليع بالدستور نعم وصحيح وما يختلف عليه اثنين .. بس ضليع بصراعات الاسره اكثر .. كل مقالاته هجوم على شخص ناصر المحمد وانا هني ما ادافع عنه .. بس هل اسباب الهجوم للمصلحه العامه ؟؟ اصبحت مقالاته تخصص في نشر صراعات الاسره وكل ما يتعلق بناصر المحمد .

ياناس قولولي شنو تاريخ هذا الشخص ؟؟؟ محامي منو كان؟؟
واذا كنت يا محمد يا عبدالقادر ياجاسم تتكلم عن الفساد وممارسات رئيس الوزراء وعدم صلاحيته للمنصب .. هل كتبت حرف واحد بحق عمك علي الخليفه ؟؟؟؟ لما تتكلم عن الفساد هل تكلمت عن سرقة القرن ؟؟؟ وهل الشيخ اكس يعطيك راتب شهري راتب وقدره .. للكتابه عن الشيخ اكس؟؟؟

...... اعزائي تجمع صوت الكويت .. عندكم رساله واضحه وهي عن الحريات وممارستها وفقا للدستور .. واعتقد اصبحت قضيه التعليم المشترك واقع لازم ندافع عنها .. دول المنطقه في تطور كبير واحنا لي الحين يسوون ندوات وتشوف ما تشتهي النفس من الوان لحاياااا غريبة الشكل علشان بس يسكرون مقاهي بالكويت ..... اتمنى التركيز على قضيه التعليم المشترك واعتقد الوقت هذا هو الوقت المناسب للتحرك

الاخوه ممثلين التيار الوطني .. نوابنه الاشواس اللي ليلحين نايمين .. اصحوا شوي الله يخليكم ارجوا اثبات مواقف وطنيه تليق بتاريخ اشخاص تدعون انتمائكم لهم ..

الوطن والأخلاق

شارع سالم المبارك استحوذ على النصيب الأكبر ثم حولي وأبوحليفة من مقاهٍ ومطاعم تحولت إلى مراقص وأماكن لـ «المجون والخلاعة ومواعد الجنسين»
بارات ومراقص ديسكو.. وعمّك اصمخ!!
بار «كذبي».. لكن اجلب خمورك معك ولدينا الثلج والمازات
كتب عبدالله النجار وعبدالله المفرح وخالد العصيدان وبسام البسام:

بارات ومراقص ديسكو في الكويت!! ليس هذا فقط، بل مجون وخلاعة و«خدمات» متنوعة تجعل من بعض الاماكن اوكارا عاملة متكاملة لممارسة الدعارة.تكشف «الوطن» اليوم عن كارثة اخلاقية تنمو في البلاد وسط حالة من الصمت لدى الجهات الرسمية المعنية تهدد بتفشي الدعارة والانفلات الاخلاقي

جريدة الوطن 25/9/

بعد ما من الله علينه بحل جميع مشاكلنه بالكويت .. وانه الصحه بخير ومستشفياتنه على مستوى عالي وراقي بالخدمات الطبيه وقاموا دول الخليج يرسلون عيالهم للعلاج عندنه ... وحل مشكله الاسكان وانه مافي كويتي الحين تلقاه بشقه .. الكل ببيته بو 1000 متر وحديقته جدامه ويمه حمام السباحه .. والتعليم بخير وصحه ومستوى الثقافه عندنه ارتفع لدرجه ما قاموا عيالنه يسجلون بجامعات الفلبين ... ومشاكل الصرف الصحي انحلت وريحة الديره صارت بخور ودهن عود والبدأ بترويج حمله خلك فارطها بدل خلك ماسكها ... وماصار عندنه بدون والكل راح ديرته الأصليه ..

الصراحه الحمدلله انه حلينه كل مشاكلنه وما عندنه مشكله الا سالفة البارات والمقاهي .. وطبعا اكيد وبدون نقاش هذي راح تكون ماده دسمه لشيخ الاسلام نبيل العوضي الكويتي حديثا .. وراح يتكلم وييب صور وحلقات مثيره راح تكون كل سبت .. وبعدين الحفلات هذي موجوده من عمر بس اذا فيكم الجرأة يا جريده الوطن وغيركم من الجرايد واللي تشوف انه هالمواضيع راح تحل مشاكل الكويت تروحون الشقق ببنيد القار والشعب واللي ملاكها اصحاب نفوذ , او المزارع والشاليهات اللي هم اصحابها هوامير ومافي شنب يقدر يقرب صوبهم للأسف ..

آآآآآآخ يا ديره .. مابقه الا انتوا يالوطن تعلمونه الأخلاق ..

عبدكم مبارك

بعد استراحه قصيره برمضان , ان شاء الله نرد ونعاود تحلطمنه مره ثانيه .. وتقبل الله طاعتكم وعبادتكم

مبارك عليكم الشهر

بعد تجربه فاشله في تغيير شكل المدونه والصراحه كانت لايعه جبدي من شكلها اليديد وقص علي الشيطان .. وبعد توجيهات الأهل والأصدقاء تم اعادة شكل المدونه القديم .. ومثل ما يقولون من فات أديمه تاااه

المهم بدايه احب اشارك اهالي الكويت بشكل عام واهالي الجهراء بشكل خاص في حادثة الجهراء وارجوا تقبل فائق العزاء لذوي المتوفين .. وارجوا من نوابنه الكرام عدم التكسب السياسي من وراء هذي الحادثه الفرديه الشخصانيه ...

موضوعي السابق كان عن المناهج وبينت فيه وجهة نظري في تعديل هذي المناهج والغاء بعض المواد مثل التربيه الاسلاميه ..

اسال سؤال .. منهج التربيه الاسلاميه شنو فاد الطلبه ؟؟

تربيه واخلاق ؟؟ للاسف الوضع التربوي والأخلاقي عندنا الى اسفل
احكام وشريعه اسلاميه ؟؟ تدرس من وجهة نظر وحده والغاء اطراف اخرى
تاريخ اسلامي عظيم؟؟ من بعد حقبة الخلفاء الأربعه وتاريخنه اسود شرب وجواري ورقص وحروب وتعذيب وسجون امتلأت بالمظاليم وكل شي مخالف للدين .. حتى لو نبي نتكلم عن حقبة الخلفاء نشوف فيه اختلافات كبيره وايضا تدريس وجهة نظر وحده والغاء اطراف اخرى

يعني شنو استفادتنه من هذي الماده ؟؟ لاشيء

خليه ارهابيه كلها كويتيين ومن عوائل معروفه ولها سمعه طيبه وفيهم ناس بشهادات عليا بس مخهم ضرب بسبب التشدد والمفهوم الخاطئ للدين وتعاليمه

اتمنى من حكومتنه تركز شوي على المساجد وعلى اللي يحاضرون فيها ويسوون دروس تعليميه ويكون فيه مراقبه شوي , تكفوون نبي أمان .. باقيلنه الأمان واتمنى انكم ما تضيعون هذي النعمه

__________________________________________________________________

عاجل-بوراشد:الكويت والسعوديه والامارات يعلنون رسميا تعذر رؤية الهلال والجمعه المتمم ورمضان السبت
تعليق:تهقون الشيعه يصومون بنفس اليوم والا يأجلون يوم كالعاده؟!


هذا نص مسج بوراشد الأخ ثامر الدخيل .. مسج وصل للكثير بالكويت وما شاء الله ياي بوقت حلو وبعد توجيهات امير البلاد بالابتعاد عن الفتنه الطائفيه ..
الشرهه مو عليك يا ثامر يالدخيل .. الشره على اعمامك سراق اموال الشعب وجريده الفتن اللي تدعمك وتدعم الخدمه مالتك

واخيرا ادعوا من الله العلي القدير ان يهدي كل ملتحي يلبس غتره بدون عقال ويرشده الى طريق الصواب ومبارك عليكم الشهر الفضيل

قضايا .. والمناهج

بعد قضيه الاستجواب الاخيره , برزت للساحه عدة قضايا ودار نقاش وبحث بين الزملاء , وباعتقادي في قضايا خذت اكبر من حجمها مثل قضيه المسرحين والقضيه الرياضيه .


نشوف قضية الرياضه المفروض نكون خالصين منها ونعطيها لذوي التخصص من الأعضاء واللي همهم أحمد الفهد .. انا شخصيا استملق سعود بوحمد وايد واخاف ابو الفهود يزعل مني وما انام الليل ويحوشني ارق .. علشان جذي ماني متكلم عن القضيه هذي ....



نروح حق قضيه المسرحين ..واللي شخصيا اشوف انها حالها حال قضيه اسقاط القروض او فوائدها وهي من القضايا الشعبيه .. بس المستغرب انه بوصلوح واللي لي الحين ناطره يرد الروح مستذبح عليها .. بومحمد ضميرك صحا شوي وتبي تعوض ؟؟
بس مو جذي الله يهداك .. هم هذي فيها نتفيع ناس ومال عام راح يروح هدر ..


القضيه الحساسه باعتقادي واللي المفروض التيار الوطني يوجه قوته عليها وهي المناهج .. قضيه قديمه والحين يت على طبق من ذهب من قبل الشيعه ... تعديل المناهج بالكامل الله يرضى عليكم وحذف شي اسمه تربيه اسلاميه وتخصيص ماده اسمها القرآن الكريم وبس ..


باعتقادي انه ماده التربيه الاسلاميه مالها داعي وقلتها من فتره واكررها ,, تعليم القرآن الكريم فقط بدون الاحكام الشرعيه والتاريخ الاسلامي اللي اغلبيته مزور واغلبيته كاس وخمره وسالفه اسقني وارقصي يا جاريه خل نبطلها شوي كافي الجيل الحالي اللي يتعلمون بالمساجد الارهاب وتكفير الغير ومحاربة الشيطان الاكبر اللي لي الحين ما ادري منو...


علشان جذي لازم يكون فيه توجيه لتغيير المناهج كلها وتغيير نظام التعليم .. وبسنه تخلف تكفون ..

حلم

حلمت خير اللهم اجعله خير, وكان هذا بقيلولة العصر بين الساعه 4 الى الساعه 6 قبل المغرب .. وبعد مطبق الزبيدي ووراه صحن فاخر من البشمل ووراه قلاص فمتو بااارد وقطعه من كيكة الخباز

المهم حلمت انه وزير الداخليه راح ساحه الاراده وقال سامحوني يا شعب الكويت فعلا انا غلطان بسالفة الخمس ملايين وراح استقيل وبعدها خذه كاميرة ومايكروفونات ساحه الاراده وكسرها جدام الناس

وانه رئيس مجلس الوزارء تنحى عن منصبه وقال يبا في اللي اصلح مني مو كله انا اصلاحي اصلاحي وعطى هديه لكل مواطن كويتي دهن عود وسياره كلاس خاصه من مصروفاته

ووزير الدفاع صعد المنصه وتكلم وواجه الاستجواب اللي كان مقدمه جمعان الحربش وبورميه ونال ثقه الشارع الكويتي

ووزير الخارجيه صرح بتصريح مفهوم وعرفنه اخيرا السياسه الخارجيه لدولة الكويت

ووزيرة التربيه سكرت جامعات الهشك بشك اللي تعلم دورة طبخ هناك وتييب شهادة دكتوراه وماخافت من النواب وتهديداتهم

ووزير الشؤؤن اخيرا اعترف للشعب شنو علاقة منصبه السابق وكفائته بوزاره الشؤون

واحمد الفهد ومرزوق الغانم يلمون بعض بالمجلس

وصالح الملا تأسف وقال انا غلطت

وعلي الراشد اختفى ... وحنطفيس كبر وصار بلبول اكبر ونزل مكان الراشد

والعنجري فهمنه منه اخيرا شنو يعني الليبراليه الاسلاميه

واسيل تحجبت ... ومعصومه حطت مكياج .. وسلوى استقالت وردت حق بيتها وعيالها

وحلمت بعد بشي حلو غريب انه ست اعضاء كانوا يلعبون كوت ببمر المجلس .. الفريق الأول كان صالح عاشور وعدنان عبدالصمد وهايف .. الفريق الثاني كان الحربش والطبطبائي وعدنان المطوع

حلمت انه سيد القلاف صرح انه سكوب قناة مثيره للفتن ومامنها فايده

حلمت انه الرئاسه عادت للرجال مره ثانيه .. عادت للسعدون ... والخرافي استقال بس ماخذ المطرقه معاه البيت

ومن آخر الاشياء اللي شفتها بالحلم ... تدرون شلون هذي فيها امن دوله

مو قلنه حلم يبا حلم

مو بس غباء .. وريحه خايسه بعد

ردوا وزاره الداخليه اخيرا .. بس ما نفوا الخبر!!! لا قالت انه الوزاره حولت الموضوع للنيابه حسما لأي جدل !! وانه ما في متهم !! .. عجييييييب
اصحاب الفكر النير من التيار الوطني الحكومي قالوا المحور الأول تحول للنيابه , انزين تحول للنيابه ووين المتهم ؟؟؟ في متهم ؟؟؟ غباااااااااااء والله
مو قلنه .. والكل تكلم بالموضوع .. والأخ سوى لقاء عقب ما صوت يبي يحاور , يالله ابي تصريح لك يالملا , بس تكفه تصريح يكون واضح ونقدر نفهمه
يالله ما تتكلمون يا انصار العداله والمنطق برفض هذا الاستجواب ونعته بالعنصري والقبلي ؟؟
خمس ملايين دينار راحت وغيرها راح تروح واكثر اذا هذيل اشكال النواب
وينكم ما اسمع حس احد فيكم ؟؟
نوابنه اصحاب المبادئ القوميه والوطنيه .. وينكم ؟؟؟
علي الراشد وينك ؟؟
وبلبوله حنطفيس بعد وينك ما اشوف لك تعليق على الخبر؟؟؟

قلنه وراح نقول ونعيد .. الاحاله للنيابه اللي مصدقه ومصدق انه راح ياخذ اجراءه الطبيعي فهو حالم ... مدمغ ... غبي ... ساذج .... ونوابنه ما اعتقد فيهم الصفات هذي , عيل ليش صدقوا؟؟ وليش اقتنعوا ؟؟؟ حسابات سياسيه وتقرب من الحكومه وخوف على الكرسي ؟؟ في اسباب ثانيه ؟؟ احد ينورني ... وايد اسئله بذهني ومحتر وايد

فعلا ... صح لسانك يا بوبدر ... صج في ريحه خايسه .. العفن السياسي فاحت ريحته...

هم لايعه جبدي

غريب انه في ناس لي الحين يدافعون عن مواقف النواب اللي المفروض يمثلون التيار الوطني , ويقولون انه محد يزايد عليهم بحمايه المال العام , امثال النائب صالح الملا , تقولون انه الملا بعيد كل البعد عن الشبهات هذي ؟؟ ليش صوت مع الوزير عيل ؟؟ اها يمكن يتله النعره العنصريه شوي ؟؟ ما ادري انا اسال انتوا قولولي او اتمنى على النائب المحترم صالح الملا انه يوضح ولو بتصريح له ...

أول شي خل اوضح شغله للكل .. بسنه 2008 اول صوت عطيت كان صالح الملا , وكنت من اشد الناس المتحمسين له وله الفضل الحقيقي اني بديت وبعد غياب من ايام الجامعه اني احضر ندوات واشارك بتجمعات سياسيه وفكريه جميله وبدأت بعالم التدوين اللي من خلاله تعرفت على اشخاص اعتز فيهم وايد .. بس خلال سنه من اداء برلماني ضعيف للملا انصدمت فيه ومن مواقفه وخاصه بسالفه مصروفات رئيس الوزراء وقانون الاستقرار المالي ومواضيع ومواقف غيرها كثيره .. عموما ب 2009 قررت اني اعطيه صوتي مره ثانيه وقلت انا اثق بالشخص هذا واحبه ولازم اعطيه فرصه ثانيه واعطيه صوتي ..

يعني لما انتقد صالح الملا على موقف معين يكون لي حق مشروع بالشي هذا لأني عطيته صوت وابي منه بالمقابل حمايه للمال العام ,وهذا دور رقابي وابي منه وضع قوانيين تصب في تنميه الديره وهذا الدور التشريعي

محد يشكك بنزاهة احد من ممثلي التيار الوطني .. بس بعد نتيجة التصويت ليش ما نشكك ؟؟ وين حمايه المال العام ؟؟ وتكفون لحد يقول كافي انه الموضوع تحول للنيابه ... لا تضحكوني الله يرضى عليكم ..

تطالبون بوجود احزاب .. من صجكم ؟؟ خل يكون عندكم التزام لقرار الحزب أول وبعدين طالبوا بالشي هذا

...
الحين بعد اصدار التحالف الوطني بيان رسمي بمحاسبة الوزير على المحور الأول وانه المحور يحمل قضيه مبدئيه لا يمكن المساومه عليها , واصدار بيان من المنبر ومقاله عبدالله النيباري بوجوب استقاله الوزير لشبه ماليه بالمحور الأول .. يعني بيانين ماخذين طول وعرض ويه علي الراشد وكان موجه لممثلي التحالف والمنبر

السؤال ... هل لدي التحالف الوطني والمنبر الديمقراطي الشجاعه والقدره على اصدار بيان ينفي تمثيلهم بمجلس 2009 بعد تصويت جلسة الاربعاء وعدم التزام ممثليهم بالقرار ؟؟؟؟

على الرغم من انه الممتنع ما تفرق عندي من اللي صوت لمرور الخمس ملايين بس تحيه للدكتوره اسيل العوضي رغم انه كان ودي تكونيين اكثر شجاعه يا دكتوره ... والدكتور حسن جوهر اللي على الأقل حفظ وجه النواب الشيعه بصوته الممتنع .. صج ما تستحون نواب شيعه عالطل والله

ما ابي اطول بالسالفه لأنه لايعه جبدي وايد واخاف من القهر اسوي نفس الزميل العزيز فريج سعود واقلبها طبخ .. لا وراح انافسك يا سعود اذا هذا شكل بيض الطماط مالك

الماده 17

دستور الكويت

الماده - 17

للأموال العامة حرمة، وحمايتها واجب علي كل مواطن

صالح الملا - أسيل العوضي - عادل الصرعاوي - رولا دشتي - العنجري

اسألكم بالله الماده هذي قريتوها ..؟؟

نداء .. الى صالح الملا

صالح الملا .. الحفاظ على المال العام مو انا اللي ارشدك طريجه ..

صالح الملا ... خل موقفك واضح وبلا التصريحات الدبلوماسيه اللي انا مع وضد بنفس الوقت ...

صالح الملا .... تذكر انك نازل بكرسي المرحوم سامي المنيس , واعتقد نعرف منو سامي المنيس

ما عندي حجي بعد ... عندي طلب .. ورجا .. خل المال العام جدام عينك ... وبذهنك .. حمد الجوعان .. عبدالله النيباري .. المرحوم د. أحمد الربعي .. المرحوم سامي المنيس .... وروح صوت

اصحوا شوي

ما ابي اكتب واطول بموضوع الاستجواب اللي صار لانه لايعة جبدي , عموما اتفق تماما في ما ذكره الزميل العزيز سعود في مدونته فريج سعود من حيث جلسة الاستجواب هي تقسيمت المجلس الحالي الى ان يتم حله او انتهاء مدته

كارثه والله اللي حصل بالجلسه , وطبعا مو قصدي انه الاستجواب كارثه ابدا , استجواب دستوري ومحاوره مهمه 100% من وجهة نظري وان كان اخر محورين فيهم شي من ضعف الادله بس تكفون المحور الاول واضح .. والله واضح .. صفقه سنة 2008 قيمتها تقريبا 5 ملاين ونفس الصفقه تكررت بقيمه 99 الف السنه هذي .. وتعليل الوزير بذلك انه المواد كانت غاليه وضيق الوقت وحجي التنويم هذا

ويطلع علي كاسكو يدافع وبكل شراسه عن شجاعة الوزير باحالة الموضوع للنيابه .. مضحك والله . والاخ الكاسكو يقول انه مسلم البراك داس ببطن الدستور .... كلام مضحك مخجل والله

هل حراميه المال العام دخلوا معقل التيار الوطني ؟؟؟

الاستجواب تكلم عن المال العام وفيه تجاوز واضح وعليه توقيع الوزير , الوزير اعترف بالشي هذا بدليل تحويله للنيابه مع انه هو اللي موقع .. ونواب التيار الوطني ساكتين ؟؟؟

ما تبون تأزيم ؟؟ عيل ليش حاربتوا علي الخليفه ؟؟ ليش تحبون حمد الجوعان ود. عبدالله النيباري وتتفاخرون فيهم وكادوا ان يدفعوا حياتهم ثمن لذلك ؟؟

شي غريب وعجيب والله .... نبي صحوه شوي تكفون بسكم خوف .. الملا .. اسيل .. رولا ... العنجري .. اصحوا شوي

اذا علي كاسكو قال انه الاستجواب نام ببطن الدستور

ترا سكوتكم هذا راح ينام ب... أم الدستور والله

والله طرطره

فعلا مجلس 2009 مضحك , بالأمس طلعلنه نائب توه خط شواربه بينو وسبالته علي كاسكو يتطاولون على العم بوعبدالعزيز , واليوم احد الفداويه ملوت احمد الفهد نبح و تطاول على النائب المحترم عادل الصرعاوي وعائلته الكريمه بأقوال سيئه الذكر لمجرد انتقاد اسياده ... فعلا العصائص قامت

نحن شعب حر نحترم الحر , اللي يحب الكويت ويحافظ ويقاتل في سبيل الدستور

النائب عادل الصرعاوي اختلف معاه فكريا لكني احترم هذا الشخص وما في اثنين يختلفون عليه من ناحية وطنية هذا الشخص وحبه للكويت , كافي انه هو النائب الوحيد اللي تكلم عن الرئاسه وممارسات الخرافي بصراحه وبدون مجامله وللأسف ممثلي التيار الوطني نايمين بالعسل والتصريحات الاصلاحيه

تبون اصلاح ؟؟ شيلوا الفساد

شجاعه

عندما قدم النائب مسلم البراك استجوابه لوزير الداخليه ما شفنه ولا تصريح لنواب التيار الوطني عن حق النائب في الاستجواب وواجب الوزير باعتلاء المنصه والرد على محاوره

أغلب التصريحات كانت انه هذا مو وقته ولازم نركز على التنميه والمشاريع ومن هالكلام المعسول

سؤال .. هل هناك ربط بين تقديم اي استجواب لأي وزير او حتى رئيس الوزراء بالتنميه او المشاريع او حتى الخطه المستقبليه اللي ما عرفناها اكثر من 30 سنه؟؟؟

هل استجواب وزير الداخليه له دخل بانشاء جامعات .. او مستشفيات حديثه .. او حل مشكله الاسكان ؟؟؟

المحاور الرئيسيه لاستجواب وزير الداخليه تتكلم عن الحريات واللي انصار التيار الوطني نبح صوتهم وهم ينادون فيها , بس الحين صاروا طرمان للاسف

ندعوا الى احترام الراي والحوار واحنا ما نطبقه .. ندعوا الى التعاون وايجاد ارضيه مشتركه بين جميع التوجهات الفكريه لبناء دوله حديثه واحنا منعزلين ونحارب اللي يعترض افكارنه .. ندعوا الي محاسبة ونقد اي شخص كائن من كان واحنا ما نحاسب وننتقد اشخاص محسوبين علينه

بعد كل هذا هل نملك الشجاعه لارجاع التيار الوطني ؟؟ اقولها للمره الالف خل نعالج قوه ومتانة مبادئنا ومدى ثباتها ونوعية الاشخاص اللي يمثلون هذا التيار وبعدين نعالج السوس اللي بالديره

كامل الاوصاف .. والحكومه

بالرغم من اعتقادي بشخصانية الاستجواب المقدم لوزير الداخليه بدليل تصريح مسلم البراك انه اذا تحول الاستجواب للدستوريه راح يكون فيه استجواب من الطاحوس واذا هذا بعد تحول راح ييلك الفارس الملثم بورميه باستجواب ثالث .. اشكره فيهم حره ..

المهم كنت اقول على الرغم من الشخصانيه الا انه حق دستوري مشروع لكل نائب بالمجلس وعلى اي وزير انه يكون شجاع ويصعد المنصه ويفند اي استجواب ...

يقينا ادري انه وزير الداخليه عنده الشجاعه الكافيه لصعود المنصه , بس ندري ومتأكدين انه رئيس الوزراء لا يملك هذا الشجاعه على صعود اي وزير تابع لحكومته للمنصه , واتوقع سيناريو مشابه للسنعوسي

طلب للحكومه من رئيسها الى وزير الشؤون اللي ما شفت ضحكته لي الحين .. ياريت تصيرون مثل شخصية كامل الأوصاف اللي يخوف وما يخاف ..

نبارك لجنة الظواهر السلبيه واعضائها الجدد ... رولا .. الدويسان .. جوهر .. هايف .. الحربش

مكس مو طبيعي .. ينشرب حتى بدون ثلج

فشل

باعتقادي انه كان في سلبيه وخذلان واضح من قبل التيارات الوطنية .. وهذا كان واضح جدا في وجهة نظري في الجلسة الافتتاحية لمجلس 2009 , ولو اشوف انه هذا الخذلان والسلبية موجودة اكثر من 20 سنة

ما تجرأ أحد على وضع اسمه مقابل اسم الخرافي مع العلم بالنتيجة بس على الاقل تسجيل موقف يا نواب وتسجيل الموقف هذا كان لازم يكون بالتجمع اللي صار بساحة الاراده بحضوركم ودعمكم ... حتى مع انتخابات نائب الرئيس بالرغم من كون الدكتوره معصومه المبارك محسوبة على التيار الليبرالي اكثر من الرومي اللي محد ينكر دعم الاخوان له ايام دوائر ال 25 , وتكفون الرومي من سنة الطواعين موجود شنو سوى بالمجلس غير الابتسامات

فعلا اشوف انه موقف متخاذل وواضح فيه معالم التخبط والفرديه بالتفكير .. ولو تسال اي احد من المنتمين للتيار الليبرالي نقوله شرايك بالاحزاب يبدي تحمسه الغريب لوجودها .. يا خوي شوف تيارك اول ما يدري وين الله قاطه وعدل فيه وبعدين يصير خير

ودايما عندهم كلمه وحده .. التيار محارب من التيارات الدينيه ... والحكومه .. والدنيا كلها

تتغشمرون ولا من صجكم؟؟؟؟

اشوف انه التيار الليبرالي ما يشكل اي خطر على التيار الديني المهيمن بالكويت , فالتيار الديني تيار منظم الى ابعد الحدود وله خطه واضحه المعالم ويتم تطبيقها ولهم فكر موحد حتى لو غلط وتافه بس يتميزون بالمحافظه على الفكره هذي

منذ سقوط التيار الوطني .. ماذا فعلنا لكل يعود هذا التيار ؟؟

ذبحنه نفسنه على قضيه وحده وهي التعليم المشترك ونسينا كل القضايا الجوهريه ... كان المفروض نعمل على انشاء جيل وطني يعرف معنى الديمقراطيه والليبراليه ويؤمن فيها

لا نقص على انفسنه ونقول احنا محاربين .. خل نعدل الفساد الداخلي اللي عندنه بالتيار وبعدين نبدي اول خطوه ..ملينا واحنا نحط اسباب فشلنه على غيرنا

وبس

مختصر .. وأكيد مفيد

كل النواب الحاليين اجمعوا على انه لازم الحكومه العزيزة تكون واضحة الملامح بصدد وضع الخطة التنموية بما تتضمنها من مشاريع وبالتالي هذي راح تكون اولى الامور الاصلاحيه من قبل الحكومه ...

خل يكون لهم نفس الاجماع على موضوع رئاسة المجلس بعد

اعتقد شبعنه ادارة ضعيفة وجهل بالدستور من قبل رئاسة المجلس .. وكافي جذي .. الا اذا الأخ رئيس المجلس السابق يبي لقب سمو وبعدين يعتزل

..

انا اقول المطرقة تريد رجل ... يعني بالمختصر

. تريد أحمد السعدون

تيتي .. تيتي

طبعا الكل مستانس لمخرجات مجلس 2009 , ومستانسين طبعا للتيار الوطني من زيادة عدد المقاعد والشيعه طبعا وصلوا ليه 9 مقاعد .. الحمدلله مجلس بصاااااااام بالعشر بدليل رجوع سمو رئيس مجلس الوزراء حفظه الله ورعاه واجماع الكل انه رجل الوقت الحاضر والقوي الامين ...
والحمدلله اي مجلس تلقون في تصريح بوجود ناس عقلاء فيه قصدهم حكوميين طبعا

وهم اقول مبروك للعنجري بالدائره الثانيه ومبروك للتحالف بشكل عام خروج النيباري ...طبعا الربع مستانسين على طيحة النيباري .. صبرتوا ونلتوا يا شباب ... والحمدلله بفضل فلوس الصقر بصليبخات والدوحه فاز العنجري ..


مبروك للدكتوره معصومه .. لعبتيها صح والله .. امرأة قويه الشخصيه وأول وزيره كنتي .. وشيعيه ... وحساويه ... تصريح بأنك ذات توجه ليبرالي شي ذكي فعلا .... وهم اللعب على انج معصومه المظلومه اللي اصحاب اللحى حطوا علي كوني شيعيه وكانوا يبون راسي هم شي ذكي وجميل ....


حدس .. على الرغم من اختلافي الفكري والمذهبي والوطني وكل شي وياكم بس فعلا حسيت انه المجلس هذا فعلا لازم تكونون موجودين فيه علشان تكتمل .. بس الحمدلله على كل شي واللهم لا شماته

السلف الصالح ... مقعدين لتكملة العدد فقط لا غير ... بس ما عليكم باقر موجود موجود بالحكومه واعتقد انه كافي ....

الشيعه .. 9 مقاعد .. ولا في الاحلام والله ... وغير الوزراء ..شعليييييييه .... الاعلامي فيصل الدويسان نصيحه شخصيه مني .. اذا تبي تضمن الكرسي ليه 30 سنه جدام .. جابل طبطب وهايف وشوف جريدة الدار شلون تدعمك

ما اقول الا تيتي تيتي مثل ما رحتي جيتي

توقعاتي

مرحبا .. ما قدرت انطر لي بعد تاريخ 16 ..
اشتقت للكتابه والتحرش ..

بس اليوم راح اكتب توقعاتي بالدوائر ال 3 الأولى .. لانه اخر دائرتين ما اعترف فيهم لوجود شبهات دستوريه حول المرشحين ..بسبب الفرعيات

الدائرة الأولى

صالح عاشور

حسن نصير

احمد لاري

معصومه المبارك

سيد القلاف

حسين الحريتي

المخلد

الرومي

العوضي

سيد عدنان عبدالصمد

الدائره الثانيه

الخرافي

مرزوق الغانم

علي الراشد

النيباري

العنجري

العبدالجادر

عدنان المطوع

الحربش

دميثير

خالد السلطان

الدائره الثالثه

صالح الملا

احمد السعدون

فيصل المسلم

وليد الطبطبائي

اسيل العوضي

رولا دشتي

الروضان

الشايجي

المليفي

الصرعاوي

توقعاتي مو شرط الترتيب طبعا ... من قلبي اتمنى سقوط الأقنعة الدينيه وبروز التيار الوطني القديم اللي همه كان الكويت وبس

نشوفكم بعد الانتخابات

قوه .. وباي

لانشغالي بالانتخابات والمباريات المهمة ... نشوفكم بعد 16-5-2009

استراحه 1

قام مراسل مدونة لوطن أجمل بمقابلة بعض النواب السابقين لمجلس الامه المنحل بالدائرة الاولى وكان هذا الحديث

المراسل : استاذ صالح عاشور .. شنو وضعك الانتخابي ؟؟

صالح عاشور : والله انا محتار وقعد ادرس الخيارات الموجوده للتحالف مع مرشحين بالدائره .

المراسل : ولقيت أحد ؟

صالح عاشور : والله لي الحين لا .. جماعه ايران خو اغسل ايدك منهم .. وربع زلزله صاروا مع ربع ايران من بعد سقوط د. يوسف الزلزله .. والحساويه مثل ما انته عارف ربعنه العيم الله يهداهم خونوا فيهم وفشلوني .. ما بقى لي أحد والله

المراسل : الله يعينك .. بس اعتقد انته لو تنزل بروحك هم تطلع الأول اخوي صالح

صالح عاشور : شكرا للاطراء

****************************

المراسل : سيد حسين القلاف صباح الخير سيد وشلون صحتك الحين ؟؟

سيد حسين : الحمدلله بخير

المراسل : سيد انته العضو الوحيد تقريبا اللي كان يطالب بحل المجلس غير دستوري .. سيد راح ترشح نفسك الحين بعد الحل الدستوري؟

سيد حسين : أولا .. انا ما قلت متى ابيه ينحل غير دستوري .. يعني راح انزل ان شاء الله .. وبعدين انا انسان وطني واحب الديره , لا يغرك العمامه اللي حاطها , انا البدوي يعطيني قبل الحضري والسني يحبي اكثر من الشيعي , اصلا اسال كل نواب المجالس اللي طافت اسألهم يحبوني يموتون فيني والله

المراسل : بيييه كليتنه سيد خلاص يبه انزل تكفه

****************************

المراسل : اخ عبدالواحد شلونك ؟؟

عبدو : هلا فيك

المراسل : بعد ما انفضحت بالجرايد على سالفة الورقه اللي كانت بينك وبين وزير الماليه .. وبعد ما اتمسخرت من مسلم البراك .. راح تنزل ولا راح تستحي وكافي عليك جذي ؟؟

عبدو : مممم .. راح استحي

*****************************

المراسل : اخ عبدالله الرومي .. في نيه للنزول ؟؟

عبدالله الرومي : والله ما ادري .. انطر الخرافي اذا بينزل , راح انزل .

المراسل : ؟؟ الخرافي بالثانيه وانته بالاولى .. ليش تبي تنطره يعني؟؟

عبدالله الرومي : علشان انافسه على الرئاسه .. كااااااااااااااااااااااااااااااااااااااااااااك

المراسل : والله طلعت نكته اخ عبدالله

اعزائي القراء .. هذا كان لقائي مع عدد من نواب مجلس الأمه السابق ونيتهم لخوض انتخابات مجلس 2009 .. ونأسف لعدم حصولنه على تصريح من النواب سيد عدنان وأحمد لاري لتواجدهم بالسفاره الايرانيه واجتماعات مكثفه لأخذ قرار خوض الانتخابات من عدمه , والدكتور حسن جوهر اللي كان قاعد بالبيت ومو راضي يصرح لأحد وناطر سيد عدنان علشان يشوف موقفه , وعدم حصولنه على تصريح من الاخ مخلد العازمي واللي شوهد متواجد بأحد البنوك لصرف الشيك اياه .. أما حبيبنه بوكندر فكان نايم لحين صدور القرار من السلف الصالح ..

تابعونه بلقاءات قادمه مع نواب ومرشحين الدائره الثانيه ..

جمله ... ومن وراها القصد

ما راح اكتب عن ضرورة التمسك بالدستور ووجوب صعود الشيخ ناصر المحمد الى المنصة ومواجهة الاستجوابات

ما راح اكتب عن تفشي الفساد المالي والاداري في مؤسسات الدولة بدون استثناء

ما راح اكتب عن تردي الخدمات العامه بالدولة بدون استثناء

ما راح اكتب عن احترام عقل الشارع الكويتي بصنع قرار سياسي جيد

بس راح اكتب جمله وحده وفيها كل القصد ...

الضرس لي من رقل .. من شلعته لا بد

الحل وينه؟؟

ملل ... وانتظار لحل الامور ... وغشاوه في الصوره ... متى بيي باجر ؟؟

اضحك .. الصوره تطلع حلوه

كل ما أسأل أحد عن وضع مجلس الأمه وأزمة الاستجوابات المقدمه لسمو رئيس الوزراء مع اني شخصيا ما أشوف انه في ازمة اساسا, يقولي حل المجلس وبس , والبعض يقولي حل غير دستوري ... حتى ساعات لما أسأل نفسي تقولي نفس الجواب

...

ليش دايما نلقى الاجابه هذي ؟؟ ليش صرنا مقتنعين فيها ونشوفها أسهل شي ؟؟؟ مع انه صعود المنصه سهل والتنحي واايد اسهل , قلنا وراح نكرر .. الوضع الاقتصادي بالبلد بالآونه الاخيره منهار .. وقبله ولازال الوضع التعليمي والاجتماعي والأمني والاسكاني والصحي والتنموي .. حتى الوضع النفسي لنا تعبان , ما بقى لنا شي ..

خلاص يعني الصوره المفروض تكون واضحه , صعود المنصه او الاستقاله والتنحي ... طبعا مو معنى هذا انه المجلس ما عليه كلام والاعضاء ملائكه , وحتى الاستجوابات المقدمه لسمو رئيس الوزراء انا اشوفها انها تحمل منافع شخصيه غير منفعه الديره .. استجواب المسلم مضحك , محور واحد وهو المصروفات اللي اساسا المليفي لما هدد بالاستجواب كان هذا واحد من محاوره , مع انه المحور اللي يبيه المليفي والاساسي هو التجنيس , المحور هذا حول للنيابه والاخ توه يبي يستجوب ... حدس ... صفقه مع الحكومه ؟؟ الصعود والظهور على الساحه بصوره مشرفه وتعويض بعض الخسائر ؟؟؟ أم صحوه شبابيه جاده ومتأخره لمصلحة الكويت ؟؟ .. ما ادري والله ..

اتمنى يكون في أمل وضحكه وتنحي من سمو الرئيس .. علشان الصوره تطلع حلوه

******************************************************************

حملة أقسم الاخيره الكل شافها وللاسف استغربت من الاخوه المدونيين الطرح المخيف والهوشه اللي صارت :):)

حمله مثل باجي الحملات الاعلاميه , شخصيا اشوفها حلوه وخفيفه ولها معني ووضحت الشي هذا بتعليقي بمدونة اخوي العزيز فريج سعود , ما اعتقد معنى الحمله والهدف من الحمله هو التأثر بالشخصيات الموجوده علشان نقسم ونحب الكويت , الفكره هي انه كل واحد بالمجتمع يقسم انه يؤدي دور مهم وبناء بالمجتمع الكويتي من خلال عمله ومجاله سواء الفني او غير ذلك وما اعتقد انه من الشخصيات اللي طلعت نكره احد معين فيهم يعني على الأقل في شخصيه وحده نحبها منو ماكان :):)

عموما اكيد في اشخاص ما راح تعجبهم الفكره وفي اشخاص خالف تعرف بس يبون يختلفون مع كل شي بالكويت بس هذي تظل وجهة نظر

kuwait

كل عام والكويت بخير

مجرد سؤال

ذكرت بالبوستات السابقه اني شخصيا مع العلمانيه وقيام مجتمع مدني وعدم وجود الدوله الاسلاميه من حيث تطبيق القوانين الاسلاميه الا بظهور الامام المهدي عجل الله فرجه وهذا رأي الشخصي , حبيت اذكر الشي هذا واربطه بتصريح السلفي العود خالد السلطان لموضوع شراء القروض الفرديه , عطانه الأخ فتوى بعد جواز شراء الدين بالدين وبعدها بيوم او اقل ترد عليه الحركه السلفيه واللي اهو يمثلها بالمجلس ومتزعمها انه يجوز .. اللي بقوله واضح يا اخوان .. فصل الفتوى على كيف كيفك ومثل ما تبي لمصالحك الشخصيه اوحتى مصالح حزبك

راح اختصر موضوع البوست بسؤال , موضوع عودة الجمعيه الثقافيه الاجتماعيه واللي راح يمثله جماعه السيد عدنان يعني ربع مسجد الامام الحسين بميدان حولي ووجود لحركه الاخوان المسلمين واللي ممثله بجمعيه الاصلاح بالروضه ووجود الحركه السلفيه وممثله بجمعيات احياء التراث واحتمال الموافقه على عوده نادي الاستقلال واللي راح يتمثل بالمنبر الديمقراطي ووجود تجمعات اخرى واللي من حقها تطالب بوجود رسمي لها وراح تتطور هذي التجمعات وتصير احزاب بالمستقبل ... هل تؤيد ظهور الأحزاب بالكويت ؟ وليش ؟

التهويسه والدبكه حلال

المشهد اللي حطووه قناة سكوب قبل جم يوم من تهويسه ودبكه فلسطينيه مع بعض أعضاء مجلس الأمه من الاخوان في الحركه الدستوريه وربع الراحل مغنيه كان شي يضحك فعلا , بالنسبه لي اللي شفته واللي حصل شي متوقع .. الوالد اليوم قالي هذيل صج ما يستحون ليش سوو جذي ربعنه ؟؟ وقصده الوالد طبعا بربعنه مو حدس اكيد .. :)

قتله عادي يبا .. الولاء والانتماء للدول الاخرى يفرض عليهم الرقص والتهويسه والدبكه وهز المكوه بعد

..

في بدايه الحرب العراقيه الايرانيه والجماعه اياها يحطون الشيعه بمواقف صعبه ومحرجه فعلا .. بعض التفجيرات اللي فعلا كان لهم مشاركه فيها .. ودم ال 16 شهيد واللي اجزم واقولها على ذمتي انه دمهم برقبة اللي طلع منها بواسطه واعجوبه واليوم نائب مجلس امه .. وتأبين مغنيه ... والحين وقوفهم مع حماس بطريقه مضحكه .. المصيبه كل هذا ولما تقترح عليهم شرايكم نسوي مسيد للشيعه بالمنطقه الفلانيه واللي يخدم 5 او 6 مناطق حواليها ؟؟ يقولون احنا تيار وطني , وما نبي تفرقه , ليش يبا تبون مسيد احنا كلنه كويتيين , عجيييب والله

اما الاخوان في حدس اثبتوا فعلا انه اليباب حلال .. ومشاركه الحريم بأي احتفاليه شرط اللبس الاسلامي حلال .. ورقص الرجال وان كانوا رجالا ايضا امام الحريم حلال .. وارضاع الكبير من ثدي زميله له بالعمل حلال , بس التعليم المشترك حراااااام , وبناتكم يدرسون بره عادي .. والربا حرام , وفلوسكم ببنوك خارجيه تحصد الملايين عادي .. وحلق اللحيه حرام , واللحيه عندكم مجرد قناع تستخدمونه متى ما تبون

..

والله فعلا احنا بزمن غريب .. وما غريب الا الشيطان

منو يسبق؟؟

استجواب حدس غريب ؟؟؟!!

استجواب سمو رئيس الوزراء فعلا اصبح اضحوكه عند الكل , كل واحد يبي شعبيه يستجوب ناصر المحمد والشي هذا كان من قبل الانتخابات السابقه حتى .. بس الغريب انه حدس اهي اللي تبي تستجوب ؟؟ بنت الحكومه اللي مالها حس وبالغصب تسمع صوتها واللي صار عمرها اكثر من 30 سنه تدللها الحكومه بكل شي .. اهي اللي تبي تستجوب !!

اعتقادي الشخصي والبسيط استجواب حدس الغريب كان مخطط له قبل التشكيل الحكومي الاخير واللي صرحت حدس بعدم الرغبه بوجود من يمثلها بالحكومه , بس لازلت استغرب الاستجواب .. وقعدت افكر وافكر ليش؟؟

وصلت انه سبب الاستجواب اما باتفاق مع الحكومه لتسهيل الحل اللي كان المفروض يصير باستجواب الثلاثي المرح واللي اعتقد انه تأجل بسبب القمه الاقتصاديه والرغبه بنجاح هذي القمه وبالتالي حدس تستعيد قواعدها على الاقل بمقعد او مقعدين زياده مع وزير بالحكومه اللي راح يترأسها ناصر المحمد مره ثانيه وترد العلاقه المدللة مره ثانيه .. او لظهور جيل جديد شبابي داخل حدس فعلا يرغب باصلاح ما تبقى من مسمى الدوله الحديثه وله نظره شموليه وحزبيه صحيحه بالتعاون مع الكل لمصلحه الدوله على عكس الجيل القديم اللي كان همه الوحيد محاربة التيار الليبرالي فقط والتركيز على اخذ المقاعد القياديه بجميع مؤسسات الدوله ..

بس مهله 6 اسابيع وايد على محاور الكل اصبح يعرفها اساسا لاي جهه راح تستجوب سمو رئيس الوزراء , بس اعتقد المليفي راح يسرق شرف تقديم الاستجواب من حدس بنهاية الاسبوع الا اذا يسحبون جم جنسيه مره ثانيه من اللي مو مشتهيهم الاخ المليفي وبالتالي يطلع مره ثانيه بمؤتمر صحفي داخل القاعه وبيده ورقه ويقعد يقول كلام منمق حلو ماراح تفهم منه شي

عموما ما راح نستبق الأحداث واللي بالجدر يطلعه الملاس واعتقد اغلبية نوابنه الافاضل صاروا ملاليس بجدر الحكومه

تنحي سمو رئيس الوزراء بات واجبا وليس مستحبا حتى ... لمصلحة الديره خلونه نتعاون ونساهم بالحل .. وطبعا قصدي حل المشاكل

نقطه خارج المضوع تكفون بسنا هلا فبراير وقلبي طاير ... ترا اللي نشوفه واللي يسمونه مظاهر احتفال تفشل ..
احتفال عيد نوروز بايران وشم النسيم بمصر واااايد احلى ... اي وقرت عينكم لرجوع البطل المغوار النائب الاصلاحي السباح الماهر المجاهد الحماسي السيد طبطب من غزه ... كنت احاتييه عاد

فليشهد الثقلان أني رافضي

بس يمكن علشان تكلمت شوي عن المذهب الشيعي بالبوست اللي طاف ادري انه الكثير منكم فكر بيييه هذا طلع طائفي وهو يدعي الوطنيه ويبي وطن أجمل وكلام الكتب والشعارات الرنانه هذي .....

صدقوني انه انا من اشد المطالبين لوجود مجتمع مدني ودوله علمانيه لاني مؤمن ومقتنع بعدم وجود الدوله الاسلاميه الصحيحه والمشرع الاسلامي العادل واللي له القدره الالهيه على تطبيق الشريعه الاسلاميه الصحيحه الى ظهور الامام المهدي ( عجل ) .

للاسف البعض يشوفون مفهموم الدوله المدنيه والعلمانيه على انه لازم تحرر واسفاف والحاد بالله ووجود خمر وحريه ليس لها حدود .. علشان يطلع جدام الناس انه مثقف وعلماني ويبي دوله ديمقراطيه ومجتمع مدني صحيح ..!!!! وطبعا هذا من مفهومه السطحي التافه ..

وودي اوضح شغله عن نفسي .. لما السالفه تكون اختيار العقل والايمان بالله ومذهب اهل البيت فأنا اكيد راح اختار منهج الائمه لانه هذا دين وايمان وهني يكون موضوع العقل فيه منتهي الصلاحيه امام الايمان بالله والعقيده الصحيحه وهي عقيده اهل البيت عليهم السلام بنظري

يقول الامام الشافعي وهو احد المذاهب الاربعه للسنه

ياراكبا قف بالمحصب من منى واهتف بساكن خيفها والناهض
سحرا اذا فاض الحجيج الى منى فيضا كملتطم الفرات الفائض
ان كان رفضا حب آل محمد فليشهد الثقلان أني رافضي


وقال ايضا ...

لو شق قلبي لألفوا به سطرين قد خطا بلا كاتب

العدل والتوحيد في جانب وحب آل البيت في جانب

خلونه نتكلم بصراحه شوي

مساء الخير للجميع .. مواضيع وايد صارت بالديره وللاسف ما كتبت عنها شي .. ولا ابديت رأي المتواضع فيها .. وودي الحين اسولف عنها شوي اذا سمحتولي ....

طبع اضحكني التجمع اللي صار بساحه الاراده علشان غزه .. والاخ طبطب رافع عقاله وجوتيه مع انه بنظري نفس الشي الاثنين .. ونبيل العوضي يتكلم بأسى وحاول كثر ما يقدر انه يبجي وتدمع عينه على غزه ودعوته للجهاد .. ترا باب الجهاد مفتوح والطريج لغزه ما يفرق عن العراق وافغانستان وايد بس الظاهر دم الشيعه اولى من اليهود بنظر قوم طالبان !!!!


واعتقد انه هفهف ما كان عنده وقت ولا تعليق عن غزه لأنه مشغول بمراقبة الحسينيات .
استغرابي الاكثر من بعض المدونين اللي يدعون الوطنيه وبين الوجه الحقيقي لهم وعقدتهم للمذهب الشيعي واعتقد انه تخوفهم للمد الشيعي , مشكلة بعض الناس لما يتكلمون يربطون الشيعه بايران وانا مو بصدد الدفاع عن ايران ولا من محبي ايران اصلا بس يا اخي اقرى التاريخ الاسلامي وشوف اصول المذاهب الاربعه من وين ... من فارس .. مو من الجزيره العربيه ,, يعني مو من عيال بطنها

المفسر جارالله الزمخشري وهو من كبار مفسري القرآن للسنه وكتابه الكشاف يقول ..

اذا سألو عن مذهبي لم ابح به وأكتمه, كتمانه لي أسلم
فانه حنفيا قلت, قالوا بأنني ابيح الطلا وهو الشراب المحرم
وان مالكيا قلت, قالوا بانني ابيح لهم اكل الكلاب وهم هم
وان شافعيا قلت, قالوا بأنني ابيح نكاح البنت والبنت تحرم
وان حنبليا قلت, قالوا بأنني ثقيل حلولي بغيض مجسم
وان قلت من أهل الحديث وحزبه يقولون : تيس ليس يدري ويفهم
تعجبت من هذا الزمان واهله فما احد من ألسن الناس يسلم
وأخرني دهري وقدم معشرا على انهم لا يعلمون وأعلم

وللحديث بقيه