تحيه للكل

مبارك عليكم الشهر وكل عام والجميع بخير

ذيل الجلب ... ولحية نبيل

ما ادري ليش شدتني الصوره هذي وايد ... مع انه العلاقه بين الجلب والقطوه عدائيه جدا مثل ما نعرف .. بس شوفوا الأثنين البرد ذابحهم فلموا بعض علشان يتدفون .... حتى الحيوانات اللي تكن لبعض العداء تتآلف مع بعضها البعض وقت الشده .. واحنا بالكويت هني نتشمت ببعض وحتى الحب صار عمله نادره بالزمن هذا ... غريب امر الأنسان والله ... واترك لكم التعليق

اول مره اشوف واحد يمدح برنامج هو بقدمه ... وطبعا اقصد نبيل العوضي ... ويمدح الشيخ ماله ولي نعمته خليفه بارك الله فيه وحرصه على برنامج السيره النبويه اللي نبيل بقدمه برمضان .. وحرص مدير القناه بارك الله فيه بعد احمد الدوغجي على توفير الأمكانات المتاحه .... يا اخي بالديره هذي اللحيه صارت وسيله للوصول والثراء الفاحش ... خليفه حرامي والدوغجي مخرج احلى فيديو كليبات فيهم بنات ورقص ولبس مو طبيعي بس الحمدلله هم حريصين على برنامج السيره النبويه ... يا سبحان الله.. صج .... الجلب يحب العظمه حتى لو عطيته لحم ....

الحسناء المغربيه وهفهف

ماشاء الله ... كل ما أقول بس ما ابي اكتب عن بعض النواب مثل هفهف اخاف يقولون عني ليش حاط عليه ومتحامل وشدعوه ومن هالكلام يفاجئني بطلبات واقتراحات عجيبه للوزراء .. واخرها هجومه على الكليه الأكاديميه الأمنيه التابعه لوزاره الداخليه ومطالبته بتدريس المواد الاسلاميه ونظام الحسبه وطاعه ولي الأمر والشريعه والفقه ومن الأمور هذي .

تكفه يا هفهف ليش ما تطالب ديوان الخدمه المدنيه انه على كل واحد يبي يقدم على الوظيفه الحكوميه لازم يكون دارس فقه وشريعه بعد ؟؟ الكليه الأمنيه اشدخله بالفقه والشريعه ونظام الحسبه ؟؟ ضباط راح يتخرجون برتب مختلفه وعملهم في السلك العسكري ليش يتعلمون ويدرسون فقه وشريعه ؟؟؟ ليييييييش؟؟؟

*******************************************************

وطبعا الأمر ما يخلى لازم بعد يتحفنا الحربش باقتراح عن تخيير المجرم اذا يبي يتعاقب بتعاليم الدين او القوانين المدنيه ..!!!! حبيبي انته والله يعني لو القاضي يسأل حرامي شنو تبي سجن سنتين ولا نقطع ايدك ,, تعتقد يالحربش شنو راح يختار الحرامي ؟؟ يعني انسان مؤمن وصالح وسوي مثل هالحرامي لازم يختار قطع اليد ,, حتى الدين صار عندكم لعب واختيار ؟؟ والله كل ما نعيش بالديره هذي نشوف منكم العجب

**********************************************************

امس رديت من دبي وكان عندي شغل يومين فقط .. كل ما اروح دبي اشوف ديره ثانيه .. غير مع انه روحاتي كل سنه وساعات مرتين او 3 مرات بالسنه .. بس الاقي في تغيير وتطور بالديره هذي .. ما اقول الا حسافه يا كويت وعليج بالعافيه يا دبي

***********************************************************

طبعا الأمر ما يخلى .. اخر ليله هناك رحت سهره بفندق .... وطبعا سهره بريئه كانت .. المهم المطرب العراقي كان يشدو بالأغاني العراقيه الجميله والماجدات العراقيات بسن الربيع يتمايلن جدامي طربا ومغنى .. وانا كنت قاعد والطرب ماخذني بعيد وانفخ بالشيشه الطيبه واتذوق حبيبات العنب الأحمر والرقي البارد مع كأس من الرد بول الصافي بدون اضافات والحمدلله .. تفاجأت واذا بحسناء مغربيه كانت جالسه بالطاوله اللي يمي وكانت جميله جدا .. تسألني ..

الحسناء المغربيه : مساء الخير

أنا : مساء الورد

الحسناء المغربيه : انته كويتي ؟؟

أنا : اي نعم

الحسناء المغربيه : عرفت انك كويتي علطول

أنا : وشلون عرفتي؟؟؟

الحسناء المغربيه : علشان انته برشه نظيف واحلاهم بالصاله

أنا : شكرا عيونج اللي حلوه

طبعا اخر جمله قلتها مع ابتسامه حياء وخجل .. وطبعا صابني غرور شوي وقلت بقلبي يا حلونا يالكويتيين .. والله ملح الخليج احنا وين ما نروح نلفت الأنظار

وطبعا طلعت من السهره الساعه 3 الفجر ورحت فندقي ونمت وثاني يوم رديت الديره علشان انسى الحسناء المغربيه واجابل هفهف وربعه

شنو انجازاتنا ؟؟؟

مر تقريبا 11يوم على تاريخ 2-8 , وهو ذكرى الغزو للوطن الجميل ... ودي اسال سؤال , شنو انجازاتنا وشنو سوينا من التحرير لي يومنه هذا ؟؟ يعني ما يقارب 17 سنه

الجواب ببساطه .. ولا شي , نعم تنقصنا وايد اشياء لو نتكلم من ناحيه انجازاتنه الملموسه , شوارعنا لي الحين نفس الشي مشكله زحمه ومشكله المرور صار لها 10 سنوات ولا يي شهر رمضان صج تلوع جبدك و الأسكان ازدادت صعوبه , الأراضي على مد النظر عندنا وكل سنه فائض الميزانيه بازدياد وقعد نشوف ارقام قياسيه اللهم لا حسد ولي الحين ننطر البيت من 12 لي 15 سنه , البوق صار اشكره عيني عينك ومن ناس المفروض اهي اللي تحمي المال العام وتكون مسؤوله وقدوه , الصحه عندنا في تدهور من حيث الخدمات والمستشفيات اللي والله تفشل لدرجه قمنا نرسل علاج بالخارج لدول مثل مصر والأمارات والسعوديه بعد ماكانوا اهم ييون عندنا يتعالجون , التعليم حدث ولا حرج من كادر تعليمي رخيص ومخرجات هشه وقمنا نروح لأفقر دول الخليج وندرس عندهم , وصار عندنا مشكله يديده وهي البطاله وانتظار الوظيفه للكويتي , اقتصاد مبني على مصدر واحد وهو النفط فقط هذا غير مشاكل العماله الزائده بالبلد واللي مالها داعي بس تنفيع افراد بشركات وهميه واحنا ما نتكلم على اي فرد نتكلم عن اسامي معروفه من تجار الأقامات
طبعا لو نتكلم على مستوى الأجتماعي , للأسف الطائفيه اصبحت اشد واقوى من قبل الغزو التطرف الديني وظهور الجماعات الدينيه المتطرفه واللي مالها حسيب ولا رقيب اصبحت عاديه جدا وفوق هذا انعدام الوعي الثقافي للفرد , وايد اشياء والله لو تكلمنه عنها ما نخلص من مشاكل وهموم

موحرام ديره نفس الكويت مبنيه على حب اهلها لبعض , وترابط شعب اصيل يحب الأرض هذي وعنده كتاب اسمه الدستور الكويتي اللي اقسم بالله انه باجي شعوب دول المنطقه تحسدنا عليه وعندنا ديمقراطيه نفتخر فيها ينقصنا اهم شي وهو احترام الرأى مهما كان , سنه وشيعه وتيار ديني وتيار لبرالي وبدو وحضر ,,, تقسيمات للمجتمع ماكنه نشوفها بزمان اول حتى لو كانت موجوده ما كنا نحس فيها .... خلونا نشوف ارض مشتركه نبني عليها ونساعد انفسنا على تجاوز الأمور التافهه وحل المشاكل ... لبناء وطن جميل ,,,, تقدرون؟؟؟


طبعا اخر صرعات التيار المتطرف عندنا من اعضاء مجلس الأمه الأشاوس هو .. بعض الألعاب الأولمبيه المقامه في بكين تحتوي على مناظر مخله وغير لائقه ولا تناسب مجتمعنا , لا سيما ان ملابس اللاعبات تخالف الذوق ويتحرج منها الأنسان ,,, طبعا هذي نصيحه قدمها النائبين حسن الكندري والعمير لوزير الأعلام ....

والله عيييييب عليكم بسكم تخلف وتطرف وامور تافهه ,,,, شوفوا مصلحه البلد احسن ... هذي نصيحتي لكم

مشغووووول وحياتي مشغووول

ادري من زمان ما كتبت شي وودي اكتب , ديرتنا ما تخلى بس والله مشغول وايد وان شاء الله اسبوع وراح ارد واكتب واطلع اللي فيني :)

مشكورين على كل من دزلي ايميل وسأل عني والف شكر

المخدرات حلال وهايف حرام

يعني اخر بوست كانت تاريخ 11 -7 يعني تقريبا قبل 11 ايام وبالنسبه لي مده طويله , يمكن ما لقيت شي اكتبه مع انه ديرتنا ومجتمعنا والتحف اللي عندنا ما يخلون كل يوم سالفه , بس صج شدني وايد كلام حسين الأحمد اللي كان , مطرب وصوته فعلا حنون وعذب وكنت اسمعله
المهم حسين تفاجأ انه الناس هناك تجارتهم الأولى هي المخدرات ,,, اعتقد انه كل كويتي يدري بالشي هذا وعندهم فتوى انه المخدرات والتجاره فيها حلال ترا , بس المصيبه انه لي الحين في ناس تروح هناك , وطبعا بعد غسيل للمخ من الكويت
اطالب الحكومه الرشيده بمنع المعسكرات الصيفيه الدينيه وكافي لي هني يا ناس بسنا دين مزيف واسلام متموج واسلامين منافقين يبون الدين ستار لهم علشان يوصلون لغايه سياسيه وسيطره لأفكارهم الظلاميه

***************************************

انا من اول المطالبين بمنع تدريس ماده التربيه الاسلاميه بالمدارس وشوفوا بدايه الشراره بين النائب صالح عاشور
والتحفه هايف والموضوع مثل اللي سمعته يتكلم عن زياره القبور وانه الشي هذا شرك بالله

قلنا احترام الأعتقاد للفرد نص وماده واضحه للدستور الكويتي وهذا حق من حقوق الفرد وقلنا وذكرنا انه منهج التربيه الأسلاميه يلغي طرف اخر موجود بالكويت لهم اعتقاد مخالف ولهم احكام شرعيه مخالفه لطرف وما ابي اقول سنه وشيعه لأني ما احب الكلمه هذي وما ابي اقول اكثر ابي تعليقاتكم وابداء وجهات النظر بموضوعيه ,, وبس

لوطن اجمل

خلونا نشوف شنو نبي علشان ترد الكويت لذلك الزمن الجميل ؟؟
من اول ظهور التيار الديني وفرض سيطرته على المجتمع بشتى الطرق وبداياته اللي كانت في تكوين علاقات بين الأفراد بتفعيل انشطه اجتماعيه رياضيه ثقافيه واخر شي يعطونك جرعه من الدين وتكون جرعه محسوبه ما تزيد ولا تنقص ,, عندنا بالكويت جهل بمواد الدستور وانا اتكلم حتى عن اللي ينتمون للتيار الوطني ويدافعون عن الدستور هم عندهم نقص وعدم فهم اغلبيه مواد الدستور , وايضا عندنا عدم قدر على تكوين انشطه بمختلف النواحي الأجتماعيه الرياضيه الثقافيه واقتصر وجودنا على عقد الندوات والذهاب الى الديوانيات اللي صارت معروفه مع انه التيار الوطني تسانده جمعيات نفع عام وهي من اقدم الجمعيات بالكويت وكانت رائده بعمل تلك الأنشطه ,, بالتالي يبيلنا شغل مكثف فمثلا

فهم معاني الدستور وتفاسير هذي المواد لضمان معرفه الفرد في الحقوق والواجبات تجاه المجتمع وبالتالي تجاه نفسه

***********

معرفه وايجاد وفهم لكلمات بدأ المجتمع الكويتي يخاف منها مثل الليبراليه والعلمانيه ومفهوم الحريه ومفهوم الدوله المدنيه وايجاد ارضيه مشتركه لمعاني تلك المصطلحات

************

تفعيل الجانب الثقافي والأجتماعي وذلك بعمل الندوات وانشطه اجتماعيه للمجتمع وبالتالي توسيع الدائره شوي

************

يجب علينا ابراز دور الأسره في المجتمع بحيث نعرف انها الأساس في بناء الفرد وغرز الخلق فيه وبالتالي مسح الفهم المطلق لرجل الدين وانه هو رجل الأخلاق الحميده بالوقت نفسه وانه الوحيد اللي يعلمنه الدين ويعلمنه الأخلاق وهو المسؤول عن التربيه والتعليم وانه الوحيد اللي عنده حلول لكل مشاكلنه بالمجتمع

صدقوني راح نتعب ويمكن نفشل من المحاولات الأولى بس النجاح ما راح يي بسهوله وتضافر الجهود مطلوب لأجل كويت اجمل ووطن اجمل

*******************************

ودي ارد برد سريع على نبيل العوضي بمقاله يوم الخميس بجريده الوطن واللي ذكر الليبراليين ودفاعهم المستميت على برنامج ستار اكاديمي وانه البرنامج هذا اهو اللي يمثل الثقافه مالتهم

يا داعيه يا محترم الدفاع اول شي كان عن مبدأ الحريات وليش دفاعا عن برناج ستار اكاديمي بالذات والحريات اللي اوجدها الدستور اللي حضرتك عايش على ارض الديره هذي وما تؤمن فيها اساسا

وبعدين المعسكرات الدينيه اللي تسوونها اخطر من برنامج ستار اكاديمي , على الأقل اللي طلعوا ونجحوا من البرنامج المذكور رفعوا اسم الكويت بالمجال الفني على عكس اللي تخرجوا من معسكرات الظلام هذي وراحوا يجاهدون ويفجرون انفسهم بأفغانستان والعراق تحت اسم الجهاد المزيف مالكم وبالتالي تشويه اسم الكويت وتشويه الدين الأسلامي اللي اجزم وعلى ذمتي انه مصيرهم مع ابليس نفسه بقاع جهنم

علموهم حب الكويت

منها منهج التربية الإسلامية في رياض الأطفال
لجنة استكمال تطبيق الشريعة ترفع 5 مشاريع للديوان الأميري
كتب مطيران الشامان:خمسة مشاريع جهزتها اللجنة العليا لاستكمال تطبيق الشريعة الاسلامية لرفعها الى سمو أمير البلاد الشيخ صباح الأحمد، وهي المركز الوطني للتنمية الاسرية، وتعديل قانون محو الامية، ومنهج التربية الاسلامية في مرحلة رياض الاطفال، والرؤية المستقبلية للتعليم الديني في الكويت



شدني الخبر وايد الصراحه ,, يعني شنو راح يضيفون منهج التربيه الأسلاميه في رياض الأطفال ؟؟؟ شنو بعلمون أطفال رياض الأطفال؟؟
منهج التربيه الأسلاميه ؟؟ يعني فقه واحكام واصول وشريعه وتأويل واحاديث وتفسير ؟؟؟ اذا ماني غلطان التربيه الأسلاميه يعني كل الأشياء هذي , غريبه , احنا نعرف بالأسلام سن التكليف للبنت او الولد بين 7 الى 10 سنوات بالنسبه للصيام والصلاه وحتى الصيام تؤمر البنت او يؤمر الولد عند البلوغ يعني بين السن 12 الى 15

سنه طبعا للمذهبين اللي عندنا السني والشيعي . واطفال رياض الأطفال بين السن 3 و 6 سنوات , شنو بتعلمونهم ؟؟؟ اعتقد المدرسات اللي يدرسون المرحله هذي يحفظونهم ايات مثل سوره الفاتحه وصوره الأخلاص ويمكن بعض المدرسات اذا شافت ياهل مميز تحفظه اكثر وبالعكس الشي هذا حلو واعتقد للسن الموجود في المرحله الدراسيه هذي كافي

وما أدري شنو تبون بعد من رؤيه مستقبليه للتعليم الديني بالكويت ؟؟ ما شاء الله عليكم سويتوا كل شي تبونه
مو كافي المعسكرات الصيفيه والمخيمات الربيعيه اللي تخرب عقول الجيل الحالي من تعليمهم لأشياء دخييله على المجتمع الكويتي وتعلمهم اصول وعادات أفغانيه طالبانيه للمعسكر السني وايرانيه بالنسبه للمعسكر الشيعي , والله مقياس المعرفه بالدين مو اللحيه ولا الثوب القصير ولا لبس اكبر عدد من الخواتم كل الأشياء هذي مالها قيمه , الأشياء والمظاهر الخارجيه ما تعني بالضروره الأنسان هذا قدوه لنا وللأسف هذا اللي يسوونه بالمعسكرات

بالأخير حرام تقتلون الطفوله وخربون العقول الشابه بالسموم ...

علموهم حب الكويت أحسن

نعرف حدودنا يا لجنه

المشكله انه معهد بنات ومافي اختلاط ولا شي ؟؟ مو ناقص الا يعممون الدشاديش والغتر على الشباب بس راح تكون في مشكله .. غتره بعقال ولا بدون عقال ؟؟

موظفات يقمن بدور الناصحات في «التجاري»
الأمن الداخلي لجنة ظواهر في التطبيقي!
جريده القبس

مو قلنا وتكلمنه عن اللجنه هذي وشنو هدفهم الرئيسي وغايتهم الخبيثه وهي قمع الحريات الفرديه وفرض الوصايه على المجتمع ..
لجنه تصادر الموبايلات وتشوف منو حاط مكياج ولا لامن البنات ؟؟؟؟ الشي هذا دخيل على المجتمع الكويتي , واذا الأعضاء يشوفون انه مراقبه التصرفات الفرديه والتدخل بالشؤون الخاصه للشخص ظاهره سلبيه ودخيله وتعلموها من المجتمع الطالباني ,, فاحنا غير بالكويت ما تعلمنه الشي هذا .. اهلنا علمونه الحريه علمونه الصح من الغلط ونعرف حدودنا عدل

قصه من وحي الخيال .. بس يمكن تصير

وانا قعد افكر لو بنصير دوله اسلاميه ونبي نطبق الشريعه .. تخيلت المشهد التالي ...
الشرطه الأسلاميه طابه على شقه ومداهمه الشقه ولقوا واحد خل نسمييه الحبيب ووحده بوضع مخل باللآداب .... يقولهم عاد

الحبيب
شتبون داشييين علينا ؟؟؟
الضابط الأسلامي

جريمه زنا وانته وياها مو زوجين
الحبيب

بس هذي مرتي وانا متزوجها متعه
الضابط الأسلامي

ووين قسيمه الزواج او العقد على الأقل ؟؟
الحبيب

ما تدري انه زواج المتعه مافيه عقد مكتوب ,, عقد شفهي ومتفقين انا وياها وهي قبلت
الضابط الأسلامي

عطني هويتك انته وياها
وبعد ما عطاه الهويه

الضابط الأسلامي
بس انته شيعي وهي سنيه

الحبيب

وشنو يعني اهي مطلقه ومسلمه وانا مسلم ومذهبي يجوز الشي هذا وهي موافقه وولية امرها وهذا كافي
الضابط الأسلامي

مممم عيل انته نحولك للمحكمه الشيعيه الأسلاميه وهي تتحول للمحكمه السنيه الأسلاميه
تدرون شنو صار بعدين وبعد المحكمه

الحبيب طلع براءه والمرأه حكموا عليها بالجلد لجريمه الزنا ...
تهقوون في عدل ؟؟؟