حلم

حلمت خير اللهم اجعله خير, وكان هذا بقيلولة العصر بين الساعه 4 الى الساعه 6 قبل المغرب .. وبعد مطبق الزبيدي ووراه صحن فاخر من البشمل ووراه قلاص فمتو بااارد وقطعه من كيكة الخباز

المهم حلمت انه وزير الداخليه راح ساحه الاراده وقال سامحوني يا شعب الكويت فعلا انا غلطان بسالفة الخمس ملايين وراح استقيل وبعدها خذه كاميرة ومايكروفونات ساحه الاراده وكسرها جدام الناس

وانه رئيس مجلس الوزارء تنحى عن منصبه وقال يبا في اللي اصلح مني مو كله انا اصلاحي اصلاحي وعطى هديه لكل مواطن كويتي دهن عود وسياره كلاس خاصه من مصروفاته

ووزير الدفاع صعد المنصه وتكلم وواجه الاستجواب اللي كان مقدمه جمعان الحربش وبورميه ونال ثقه الشارع الكويتي

ووزير الخارجيه صرح بتصريح مفهوم وعرفنه اخيرا السياسه الخارجيه لدولة الكويت

ووزيرة التربيه سكرت جامعات الهشك بشك اللي تعلم دورة طبخ هناك وتييب شهادة دكتوراه وماخافت من النواب وتهديداتهم

ووزير الشؤؤن اخيرا اعترف للشعب شنو علاقة منصبه السابق وكفائته بوزاره الشؤون

واحمد الفهد ومرزوق الغانم يلمون بعض بالمجلس

وصالح الملا تأسف وقال انا غلطت

وعلي الراشد اختفى ... وحنطفيس كبر وصار بلبول اكبر ونزل مكان الراشد

والعنجري فهمنه منه اخيرا شنو يعني الليبراليه الاسلاميه

واسيل تحجبت ... ومعصومه حطت مكياج .. وسلوى استقالت وردت حق بيتها وعيالها

وحلمت بعد بشي حلو غريب انه ست اعضاء كانوا يلعبون كوت ببمر المجلس .. الفريق الأول كان صالح عاشور وعدنان عبدالصمد وهايف .. الفريق الثاني كان الحربش والطبطبائي وعدنان المطوع

حلمت انه سيد القلاف صرح انه سكوب قناة مثيره للفتن ومامنها فايده

حلمت انه الرئاسه عادت للرجال مره ثانيه .. عادت للسعدون ... والخرافي استقال بس ماخذ المطرقه معاه البيت

ومن آخر الاشياء اللي شفتها بالحلم ... تدرون شلون هذي فيها امن دوله

مو قلنه حلم يبا حلم

مو بس غباء .. وريحه خايسه بعد

ردوا وزاره الداخليه اخيرا .. بس ما نفوا الخبر!!! لا قالت انه الوزاره حولت الموضوع للنيابه حسما لأي جدل !! وانه ما في متهم !! .. عجييييييب
اصحاب الفكر النير من التيار الوطني الحكومي قالوا المحور الأول تحول للنيابه , انزين تحول للنيابه ووين المتهم ؟؟؟ في متهم ؟؟؟ غباااااااااااء والله
مو قلنه .. والكل تكلم بالموضوع .. والأخ سوى لقاء عقب ما صوت يبي يحاور , يالله ابي تصريح لك يالملا , بس تكفه تصريح يكون واضح ونقدر نفهمه
يالله ما تتكلمون يا انصار العداله والمنطق برفض هذا الاستجواب ونعته بالعنصري والقبلي ؟؟
خمس ملايين دينار راحت وغيرها راح تروح واكثر اذا هذيل اشكال النواب
وينكم ما اسمع حس احد فيكم ؟؟
نوابنه اصحاب المبادئ القوميه والوطنيه .. وينكم ؟؟؟
علي الراشد وينك ؟؟
وبلبوله حنطفيس بعد وينك ما اشوف لك تعليق على الخبر؟؟؟

قلنه وراح نقول ونعيد .. الاحاله للنيابه اللي مصدقه ومصدق انه راح ياخذ اجراءه الطبيعي فهو حالم ... مدمغ ... غبي ... ساذج .... ونوابنه ما اعتقد فيهم الصفات هذي , عيل ليش صدقوا؟؟ وليش اقتنعوا ؟؟؟ حسابات سياسيه وتقرب من الحكومه وخوف على الكرسي ؟؟ في اسباب ثانيه ؟؟ احد ينورني ... وايد اسئله بذهني ومحتر وايد

فعلا ... صح لسانك يا بوبدر ... صج في ريحه خايسه .. العفن السياسي فاحت ريحته...

هم لايعه جبدي

غريب انه في ناس لي الحين يدافعون عن مواقف النواب اللي المفروض يمثلون التيار الوطني , ويقولون انه محد يزايد عليهم بحمايه المال العام , امثال النائب صالح الملا , تقولون انه الملا بعيد كل البعد عن الشبهات هذي ؟؟ ليش صوت مع الوزير عيل ؟؟ اها يمكن يتله النعره العنصريه شوي ؟؟ ما ادري انا اسال انتوا قولولي او اتمنى على النائب المحترم صالح الملا انه يوضح ولو بتصريح له ...

أول شي خل اوضح شغله للكل .. بسنه 2008 اول صوت عطيت كان صالح الملا , وكنت من اشد الناس المتحمسين له وله الفضل الحقيقي اني بديت وبعد غياب من ايام الجامعه اني احضر ندوات واشارك بتجمعات سياسيه وفكريه جميله وبدأت بعالم التدوين اللي من خلاله تعرفت على اشخاص اعتز فيهم وايد .. بس خلال سنه من اداء برلماني ضعيف للملا انصدمت فيه ومن مواقفه وخاصه بسالفه مصروفات رئيس الوزراء وقانون الاستقرار المالي ومواضيع ومواقف غيرها كثيره .. عموما ب 2009 قررت اني اعطيه صوتي مره ثانيه وقلت انا اثق بالشخص هذا واحبه ولازم اعطيه فرصه ثانيه واعطيه صوتي ..

يعني لما انتقد صالح الملا على موقف معين يكون لي حق مشروع بالشي هذا لأني عطيته صوت وابي منه بالمقابل حمايه للمال العام ,وهذا دور رقابي وابي منه وضع قوانيين تصب في تنميه الديره وهذا الدور التشريعي

محد يشكك بنزاهة احد من ممثلي التيار الوطني .. بس بعد نتيجة التصويت ليش ما نشكك ؟؟ وين حمايه المال العام ؟؟ وتكفون لحد يقول كافي انه الموضوع تحول للنيابه ... لا تضحكوني الله يرضى عليكم ..

تطالبون بوجود احزاب .. من صجكم ؟؟ خل يكون عندكم التزام لقرار الحزب أول وبعدين طالبوا بالشي هذا

...
الحين بعد اصدار التحالف الوطني بيان رسمي بمحاسبة الوزير على المحور الأول وانه المحور يحمل قضيه مبدئيه لا يمكن المساومه عليها , واصدار بيان من المنبر ومقاله عبدالله النيباري بوجوب استقاله الوزير لشبه ماليه بالمحور الأول .. يعني بيانين ماخذين طول وعرض ويه علي الراشد وكان موجه لممثلي التحالف والمنبر

السؤال ... هل لدي التحالف الوطني والمنبر الديمقراطي الشجاعه والقدره على اصدار بيان ينفي تمثيلهم بمجلس 2009 بعد تصويت جلسة الاربعاء وعدم التزام ممثليهم بالقرار ؟؟؟؟

على الرغم من انه الممتنع ما تفرق عندي من اللي صوت لمرور الخمس ملايين بس تحيه للدكتوره اسيل العوضي رغم انه كان ودي تكونيين اكثر شجاعه يا دكتوره ... والدكتور حسن جوهر اللي على الأقل حفظ وجه النواب الشيعه بصوته الممتنع .. صج ما تستحون نواب شيعه عالطل والله

ما ابي اطول بالسالفه لأنه لايعه جبدي وايد واخاف من القهر اسوي نفس الزميل العزيز فريج سعود واقلبها طبخ .. لا وراح انافسك يا سعود اذا هذا شكل بيض الطماط مالك

الماده 17

دستور الكويت

الماده - 17

للأموال العامة حرمة، وحمايتها واجب علي كل مواطن

صالح الملا - أسيل العوضي - عادل الصرعاوي - رولا دشتي - العنجري

اسألكم بالله الماده هذي قريتوها ..؟؟

نداء .. الى صالح الملا

صالح الملا .. الحفاظ على المال العام مو انا اللي ارشدك طريجه ..

صالح الملا ... خل موقفك واضح وبلا التصريحات الدبلوماسيه اللي انا مع وضد بنفس الوقت ...

صالح الملا .... تذكر انك نازل بكرسي المرحوم سامي المنيس , واعتقد نعرف منو سامي المنيس

ما عندي حجي بعد ... عندي طلب .. ورجا .. خل المال العام جدام عينك ... وبذهنك .. حمد الجوعان .. عبدالله النيباري .. المرحوم د. أحمد الربعي .. المرحوم سامي المنيس .... وروح صوت

اصحوا شوي

ما ابي اكتب واطول بموضوع الاستجواب اللي صار لانه لايعة جبدي , عموما اتفق تماما في ما ذكره الزميل العزيز سعود في مدونته فريج سعود من حيث جلسة الاستجواب هي تقسيمت المجلس الحالي الى ان يتم حله او انتهاء مدته

كارثه والله اللي حصل بالجلسه , وطبعا مو قصدي انه الاستجواب كارثه ابدا , استجواب دستوري ومحاوره مهمه 100% من وجهة نظري وان كان اخر محورين فيهم شي من ضعف الادله بس تكفون المحور الاول واضح .. والله واضح .. صفقه سنة 2008 قيمتها تقريبا 5 ملاين ونفس الصفقه تكررت بقيمه 99 الف السنه هذي .. وتعليل الوزير بذلك انه المواد كانت غاليه وضيق الوقت وحجي التنويم هذا

ويطلع علي كاسكو يدافع وبكل شراسه عن شجاعة الوزير باحالة الموضوع للنيابه .. مضحك والله . والاخ الكاسكو يقول انه مسلم البراك داس ببطن الدستور .... كلام مضحك مخجل والله

هل حراميه المال العام دخلوا معقل التيار الوطني ؟؟؟

الاستجواب تكلم عن المال العام وفيه تجاوز واضح وعليه توقيع الوزير , الوزير اعترف بالشي هذا بدليل تحويله للنيابه مع انه هو اللي موقع .. ونواب التيار الوطني ساكتين ؟؟؟

ما تبون تأزيم ؟؟ عيل ليش حاربتوا علي الخليفه ؟؟ ليش تحبون حمد الجوعان ود. عبدالله النيباري وتتفاخرون فيهم وكادوا ان يدفعوا حياتهم ثمن لذلك ؟؟

شي غريب وعجيب والله .... نبي صحوه شوي تكفون بسكم خوف .. الملا .. اسيل .. رولا ... العنجري .. اصحوا شوي

اذا علي كاسكو قال انه الاستجواب نام ببطن الدستور

ترا سكوتكم هذا راح ينام ب... أم الدستور والله

والله طرطره

فعلا مجلس 2009 مضحك , بالأمس طلعلنه نائب توه خط شواربه بينو وسبالته علي كاسكو يتطاولون على العم بوعبدالعزيز , واليوم احد الفداويه ملوت احمد الفهد نبح و تطاول على النائب المحترم عادل الصرعاوي وعائلته الكريمه بأقوال سيئه الذكر لمجرد انتقاد اسياده ... فعلا العصائص قامت

نحن شعب حر نحترم الحر , اللي يحب الكويت ويحافظ ويقاتل في سبيل الدستور

النائب عادل الصرعاوي اختلف معاه فكريا لكني احترم هذا الشخص وما في اثنين يختلفون عليه من ناحية وطنية هذا الشخص وحبه للكويت , كافي انه هو النائب الوحيد اللي تكلم عن الرئاسه وممارسات الخرافي بصراحه وبدون مجامله وللأسف ممثلي التيار الوطني نايمين بالعسل والتصريحات الاصلاحيه

تبون اصلاح ؟؟ شيلوا الفساد

شجاعه

عندما قدم النائب مسلم البراك استجوابه لوزير الداخليه ما شفنه ولا تصريح لنواب التيار الوطني عن حق النائب في الاستجواب وواجب الوزير باعتلاء المنصه والرد على محاوره

أغلب التصريحات كانت انه هذا مو وقته ولازم نركز على التنميه والمشاريع ومن هالكلام المعسول

سؤال .. هل هناك ربط بين تقديم اي استجواب لأي وزير او حتى رئيس الوزراء بالتنميه او المشاريع او حتى الخطه المستقبليه اللي ما عرفناها اكثر من 30 سنه؟؟؟

هل استجواب وزير الداخليه له دخل بانشاء جامعات .. او مستشفيات حديثه .. او حل مشكله الاسكان ؟؟؟

المحاور الرئيسيه لاستجواب وزير الداخليه تتكلم عن الحريات واللي انصار التيار الوطني نبح صوتهم وهم ينادون فيها , بس الحين صاروا طرمان للاسف

ندعوا الى احترام الراي والحوار واحنا ما نطبقه .. ندعوا الى التعاون وايجاد ارضيه مشتركه بين جميع التوجهات الفكريه لبناء دوله حديثه واحنا منعزلين ونحارب اللي يعترض افكارنه .. ندعوا الي محاسبة ونقد اي شخص كائن من كان واحنا ما نحاسب وننتقد اشخاص محسوبين علينه

بعد كل هذا هل نملك الشجاعه لارجاع التيار الوطني ؟؟ اقولها للمره الالف خل نعالج قوه ومتانة مبادئنا ومدى ثباتها ونوعية الاشخاص اللي يمثلون هذا التيار وبعدين نعالج السوس اللي بالديره

كامل الاوصاف .. والحكومه

بالرغم من اعتقادي بشخصانية الاستجواب المقدم لوزير الداخليه بدليل تصريح مسلم البراك انه اذا تحول الاستجواب للدستوريه راح يكون فيه استجواب من الطاحوس واذا هذا بعد تحول راح ييلك الفارس الملثم بورميه باستجواب ثالث .. اشكره فيهم حره ..

المهم كنت اقول على الرغم من الشخصانيه الا انه حق دستوري مشروع لكل نائب بالمجلس وعلى اي وزير انه يكون شجاع ويصعد المنصه ويفند اي استجواب ...

يقينا ادري انه وزير الداخليه عنده الشجاعه الكافيه لصعود المنصه , بس ندري ومتأكدين انه رئيس الوزراء لا يملك هذا الشجاعه على صعود اي وزير تابع لحكومته للمنصه , واتوقع سيناريو مشابه للسنعوسي

طلب للحكومه من رئيسها الى وزير الشؤون اللي ما شفت ضحكته لي الحين .. ياريت تصيرون مثل شخصية كامل الأوصاف اللي يخوف وما يخاف ..

نبارك لجنة الظواهر السلبيه واعضائها الجدد ... رولا .. الدويسان .. جوهر .. هايف .. الحربش

مكس مو طبيعي .. ينشرب حتى بدون ثلج

فشل

باعتقادي انه كان في سلبيه وخذلان واضح من قبل التيارات الوطنية .. وهذا كان واضح جدا في وجهة نظري في الجلسة الافتتاحية لمجلس 2009 , ولو اشوف انه هذا الخذلان والسلبية موجودة اكثر من 20 سنة

ما تجرأ أحد على وضع اسمه مقابل اسم الخرافي مع العلم بالنتيجة بس على الاقل تسجيل موقف يا نواب وتسجيل الموقف هذا كان لازم يكون بالتجمع اللي صار بساحة الاراده بحضوركم ودعمكم ... حتى مع انتخابات نائب الرئيس بالرغم من كون الدكتوره معصومه المبارك محسوبة على التيار الليبرالي اكثر من الرومي اللي محد ينكر دعم الاخوان له ايام دوائر ال 25 , وتكفون الرومي من سنة الطواعين موجود شنو سوى بالمجلس غير الابتسامات

فعلا اشوف انه موقف متخاذل وواضح فيه معالم التخبط والفرديه بالتفكير .. ولو تسال اي احد من المنتمين للتيار الليبرالي نقوله شرايك بالاحزاب يبدي تحمسه الغريب لوجودها .. يا خوي شوف تيارك اول ما يدري وين الله قاطه وعدل فيه وبعدين يصير خير

ودايما عندهم كلمه وحده .. التيار محارب من التيارات الدينيه ... والحكومه .. والدنيا كلها

تتغشمرون ولا من صجكم؟؟؟؟

اشوف انه التيار الليبرالي ما يشكل اي خطر على التيار الديني المهيمن بالكويت , فالتيار الديني تيار منظم الى ابعد الحدود وله خطه واضحه المعالم ويتم تطبيقها ولهم فكر موحد حتى لو غلط وتافه بس يتميزون بالمحافظه على الفكره هذي

منذ سقوط التيار الوطني .. ماذا فعلنا لكل يعود هذا التيار ؟؟

ذبحنه نفسنه على قضيه وحده وهي التعليم المشترك ونسينا كل القضايا الجوهريه ... كان المفروض نعمل على انشاء جيل وطني يعرف معنى الديمقراطيه والليبراليه ويؤمن فيها

لا نقص على انفسنه ونقول احنا محاربين .. خل نعدل الفساد الداخلي اللي عندنه بالتيار وبعدين نبدي اول خطوه ..ملينا واحنا نحط اسباب فشلنه على غيرنا

وبس