اولا اسف على التأخير بكتابة المواضيع وادري انه امور ساخنه صايره بالديره بس عذروني على التأخير ..قبل لا اكتب عن رأي المتواضع باستجواب رئيس مجلس الوزراء احب ان اشيد بمعرض تجمع صوت الكويت .. فعلا الشباب الكويتي بخير .. ابدعتوا وصج حسيت انه راح يكون الوطن أجمل بكثير بالمستقبل القريب
الديره والوضع السياسي بالبلد اصبح على صفيح ساخن مثل ما يقولون , وما أدري ليش؟؟ بس يعني علشان تقديم النائب أحمد المليفي استجوابه لرئيس مجلس الوزراء؟؟ عيل وين الديمقراطيه والحريه اللي تنادون فيها وتتكلمون عنها وتتباهون انكم تطبقونها؟؟؟ هل صعود رئيس مجلس الوزراء الى منصة الاستجواب خط أحمر فعلا؟؟ هل تصريح بعض النواب بأنه الوقت غير مناسب الحين كلام منطقي؟؟ شنو تبون يصير فينا أكثر من جذي؟؟ ليش سوينا انتخابات عيل؟؟
ليش عندنا سلطه تشريعيه ورقابيه ؟؟
ومتى الوقت المناسب؟؟؟
يمكن ننطر شوي لما تكون البلد بخير .. والاقتصاد الكويتي والبورصه تمام , أو لما المشكله الاسكانيه تنحل والكويتي لما يتزوج يعطونه البيت مع فلوس المهر من بنك التسليف , او لما التربيه ومخرجات التعليم تكون على مستوى راقي والوعي الثقافي عندنا يكون عالي وتنمحي سالفه الطائفيه والعنصريه والقبليه والمحسوبيه والواسطه , أو يمكن الحراميه الكبار يحاسبونهم بالأسم , او يمكن ناطرين لما ترجع الرياضه الكويتيه للحياة وما نكون مجرد ورقه بيضاء , وتنحل مشاكل الصحه والبدون عندنا يعيشون وماخذين كامل حقوقهم الانسانيه ويكون عندنا خطط مستقبليه واضحه ومشاريع تنمويه وحيويه تنهض بالبلد ونرتقي
خلاص عيل مدام الصعود خط أحمر .. رجعوا ولايه العهد مع رئاسه مجلس الوزراء وفكونا
بوأنس .. لا تتراجع فالوضع لا يسمح بالمجاملات على حساب مصلحه الديره
13 comments:
لا تراجع
لا مجاملات
شفيه مطقوق عبدالناصر
وين اللا ثالثة؟
لا مساومات
حلّووووه وفكووونه
الاستجواب يستدعي الحل
شخصياً أتطلع لكلاهما
لكن نريده حل دستوري
بس هذا يعني انتخابات قريبة وعذابات متجددة
أف، مافي مخرج من هالدوامة؟
ma6goog
صح كلامك يا ريس ,, بس يا خوفي ننسى الحجي هذا بعد 6-11-2008 ونقول نعم للتراجع نعم للمجاملات
حلم جميل بوطن أفضل
ما ادري بس الا الثالثه اقوى وحده فيهم عاد واللي انا خايف منها
anonymous
ليش جنه المجلس قاعد على قلبك
بس نبي حل دستوري عاد
white wings
شفايدة الانتخابات والناس مثل ما اهي من غير وعي .. يعني راح نشهد نفس الاشخاص ونفس الازمات ونفس كل شي
يبيله فكره يديده بس فكري معاي عاد :)
لو الله يفكنا منهالمرض اللي اسمه المجامله
بنرتاح اكيد..:(
بصراحه مليت من الاستجوابات ياكثر ما استجوبنا وهذا سيفوه وهاذي خلاجينه يعني ماتغير شي وياما انحل المجلس وسوينا انتخابات جديده وهم ماكو تغيير لا بوجوه الاعضاء ولا بسياساتهم يعني لاطبنا ولاغدا الشر ما ادري العيب بالوزراء ولا بالنواب ولا فينا احنا اللي نوصل ناس مو كفو لكرسي المجلس وتالي نقعد نتحلطم بصراحه نعم للتغيير تغيير الوجوه اللي في المجلس بس للاسف ماراح نشوف هالتغيير الا لما تتغير نظرتنا للمرشحيين وننسى القبليه والطائفيه ونتذكر امنا كلنا الغاليه الكويت الكويت تستاهل ناس احسن من جذي
اقصوصه
اكيد راح نرتاح بس للاسف متى؟؟؟
q80ya4ever
يبيلنه وعي ثقافي سياسي علشان لما نيي ننتخب نعرف منو ننتخب ويمثلنا
بس يبيلنه شغل
على العموم حياكم صوت الكويت
soutalkuwait.com
شكرا للمرور
مشكور اخوي على الترحيب وصح كلامك يبيله وعي يعني الناخب لازم يكون عنده ثقافه انتخابيه مثلا انه يعرف تاريخ المرشح السياسي وتوجهاته السياسيه والسيره الذاتيه للمرشح لانه هالامور ممكن تحدد تحدد نوع المجلس القادم لكن للاسف انه اللي حاصل الحين ان الناخب الكويتي يصوت بعواطفه ويلغي العقل يعني اصوت لولد القبيله او ابن المذهب ويتناسون مصلحة الديره ويقدمون عليها مصالحهم الشخصيه وحبيت اطلب منكم طلب ياريت تدعون لي الاسبوع الجاي امتحاناتي يالله هانت سنتين واودع الثانويه بلارجعه
Post a Comment