Saturday, June 28, 2008

قصه من وحي الخيال .. بس يمكن تصير


وانا قعد افكر لو بنصير دوله اسلاميه ونبي نطبق الشريعه .. تخيلت المشهد التالي ...
الشرطه الأسلاميه طابه على شقه ومداهمه الشقه ولقوا واحد خل نسمييه الحبيب ووحده بوضع مخل باللآداب .... يقولهم عاد
الحبيب
شتبون داشييين علينا ؟؟؟
الضابط الأسلامي
جريمه زنا وانته وياها مو زوجين
الحبيب
بس هذي مرتي وانا متزوجها متعه
الضابط الأسلامي
ووين قسيمه الزواج او العقد على الأقل ؟؟
الحبيب
ما تدري انه زواج المتعه مافيه عقد مكتوب ,, عقد شفهي ومتفقين انا وياها وهي قبلت
الضابط الأسلامي
عطني هويتك انته وياها
وبعد ما عطاه الهويه
الضابط الأسلامي
بس انته شيعي وهي سنيه
الحبيب
وشنو يعني اهي مطلقه ومسلمه وانا مسلم ومذهبي يجوز الشي هذا وهي موافقه وولية امرها وهذا كافي
الضابط الأسلامي
مممم عيل انته نحولك للمحكمه الشيعيه الأسلاميه وهي تتحول للمحكمه السنيه الأسلاميه
تدرون شنو صار بعدين وبعد المحكمه

الحبيب طلع براءه والمرأه حكموا عليها بالجلد لجريمه الزنا ...
تهقوون في عدل ؟؟؟

Wednesday, June 25, 2008

دين مزيف + نواب فزعه =ظواهر دخيله

ودي اسال سؤال حق الأشاوس ملوت اللجنه ... هل يعتبر النقاب من الظواهر الدخيله على المجتمع الكويتي ؟؟؟
جموع علماء السنه والشيعه قالوا الحجاب هو الشرع مو النقاب بس زاد بالمجتمع الكويتي النقاب بشكل مخييف وهذا رأيي الخاص بس صج ابي احد يرد على السؤال هل النقاب من الظواهر الدخيله على المجتمع الكويتي ؟؟؟؟؟؟؟
*************************
محمد هايف المطيري لما كان مواطن ماله صلاحيه تشريعيه بالديره طالب بمراقبه الحسينيات وعنده قضايا مع شيوخ وساده شيعه مع انه الحسينيات موجوده في الكويت قبل اكثر من 150 سنه بوااايد .. والحين صار عضو وله صفه رسميه ويشرع قوانيييين بعد ومقرر اللجنه مالت الظواهر .. تهقوون شنو راح يسوي الحين ؟؟؟ هل راح يقدم مشروع رسمي يطلع من اللجنه ويطالب فيه مراقبه الحسينات وعدم الطبخ بيوم عاشوراء وعدم لبس الأسود ويعتبرها من العادات الدخيله ؟؟ وشنو راح يكون الموقف الشيعي اللي وافق على اللجنه هذي ؟؟؟
*************************
بندوه يوم الأثنين اللي اقامها اتحاد طلبه الكويت فرع امريكا ويعطيهم العافيه على الندوه عموما ,, كان ودي اسال سؤال للنائب الفذ جمعان الحربش ... انته نائب فزعه ولا نائب اسلامي ؟؟؟ يعني لو فيه قانون له مصلحه بالتيار الديني المنتي له وفيه تعارض مع قبيلتك .. شنو تختار ؟؟؟؟ الفزعه او الدين ؟؟؟؟ بس اعتقد الجواب معروف للكل
**************************
اللجنه اللي الأخوان يفتخرون بعملها من المجلس السابق كان لها انجازات عظيييمه ترا وهي حظر عمل النساء بعد الساعه 8 مساءا يعني انتهاك لمبدأ المساواه بين الرجل والمرأه .. وانجازاتهم بعد منع الآسيويات من العمل بصالات التسليه .. يقولون منعا لانتشار
الفساد .. منطق والله وانجازات عظيمه
**************************
اللجنه الموجوده قالوا انها تبي تحارب البويات والجنوس والمخدرات والمسكرات بس الغريب انه الأشياء هذي لها عقوبات بوزاره الداخليه اللي اهي تمثل الدور التنفيذي والسلطه والقانون للمجتمع يعني شنو تبون تسوون اكثر قانون وموجود شنو تبون تدرسون بعد؟؟؟ وعلى فكره كلمه ظاهره عباره عن انتشار الشي يعني الأشياء هذيل ظواهر ومنتشره بالمجتمع الكويتي ولازم بكل بيت فيه جنس او بويه او في واحد سكير او واحد راعي حشيش هذي معني كلمه ظاهره يا اخوان تفشي الشي وانتشاره وما اعتقد انه الأشياء هذي اصبحت ظواهر , غطاء الدين والأسلام المزيف اللي تتلحفون فيه اصبح ظاهره ودخييله على المجتمع الكويتي بس راح تنتهي ويعود الزمن الجميل وبس

Friday, June 20, 2008

اللجنه دخيله ليش محتريين ؟؟؟

المهري : الظواهر السلبيه لجنه برلمانيه تافهة وشاذة ..وتشكيلها بدعة وضلالة

جريده السياسة



المفروض يا سيد تنصح نوابك اللي يمثلون الطائفه الشيعيه واللي كلهم ما شاء الله نجحوا بالدائره الأولى ليش صوتوا
مع اللجنه وليش ما اعترضوا او تحفظوا عليها على الأقل , ما اقول الا ناقصكم التنسيق كالعاده وكل واحد يقول شي




الطبطبائي وصفها بالخطوة المتخبطة.. والعميري: الدكتاتورية لن ترهبنا


جريده الوسط



المفروض من زمان يا امريكا قبل الأنتخابات تسوون جذي ولا فلوس الأنتخابات من وين لهم هذيل كله من خير الناس اللي على ويووهم اهل الكويت قالوا مساعده وسيده ما صدقوا دفعوا من طيبهم والله والأخ الطبطبائي اقوله هذي خطوه جريئه مو متخبطه ويا العميري الدكتاتوريه اهي لجنه الضوابط مالتكم وبعدين فرض الحجاب بالقوه بالقانون اليديد مو دكتاتوريه ؟؟




الخرافي كرّم 38 من متفوقي «الرؤية»: ردوا الجميل لوطنكم الكويت


جريده الأنباء



مو لايق اخ جاسم والله بس لازم ترد الجميل لهم شالللوك والله بالرئاسه , لا وبعد مصرح انه هذي المناسبات تشرح
الصدر يا سلام على الكلام العاطفي والله .... اللهم اشرح لرئيس مجلس امتنا صدره ويسر لهم اموره اللي يايه يا رب




والحين ودي ارد على الداعيه اللي خذا الجنسيه من قبل 8 سنوات ولا اقصد هنا الشماته او التقليل من البدون علشان لا يفهم كلامي غلط بس وين كان قبل الجنسيه ووين برامجه ووين كان اعلامه المناصر للدين ولا الجنسيه لها علاقه بالدين بعد؟؟؟
المهم في مقالته اللي كانت يوم اللأحد بتاريخ 15-6-2008 راح نستلم فقره فقره تقريبا من مقالته وودي ارد كمواطن بسيط يعرف بدينه
القليل ويعرف انه الحريه ايمان




يقول الداعيه الكويتي



فالمسألة باختصار شديد هي «ايمان» و«نفاق»!! مؤمنون بالله يعبدونه ويتبعون شرعه ولهذا فهم يعتقدون ان «المعروف» كل ما أمر الله به، و«المنكر» كل ما نهى الله عنه، فهم والله خير الناس وخير الأمم، قال تعالى: (كنتم خير أمة أُخرجت للناس تأمرون بالمعروف وتنهون عن المنكر وتؤمنون بالله)، وقال تعالى: (والمؤمنون والمؤمنات بعضهم أولياء بعض يأمرون بالمعروف وينهون عن المنكر).أما الفريق الاخر والذي يدعو الى الرذيلة، ويحارب الفضيلة، يذم الستر والحجاب ويشجع التبرج والسفور، يبغض بعض أحكام الشريعة التي تخالف هواه، يشجع على الوقوع بالذنوب والمعاصي ويدعو لانتشارها، فهؤلاء هم «المنافقون» الذي قال الله فيهم: (والمنافقون والمنافقات بعضهم من بعض يأمرون بالمنكر وينهون عن المعروف


فهم يصلون أمام الناس «رياء» وسمعة، ويتصدقون لكن ليس لله، يذكرون الله قليلا بلسانهم ولكنهم يكفرون بدينه وبشريعته وحكمه، هؤلاء الذين قال الله فيهم: (إن المنافقين في الدرك الاسفل من النارا




الحمدلله على انا احنا كلنا مسلمين ودرجه الأيمان تختلف من شخص لي شخص بس عيب والله تسمي اللي ما يبي اللجنه بالمنافقين وتشبهم بالمنافقين اللي كانوا مع الرسول (ص) وكان يعرفهم الرسول واحد واحد وبعدين تعال تعرف منو كان المنافقين بالمدينه اللي نزلت الأيه عليهم اللي هم كان فيهم تجار واصحاب مقربين المفروض للرسول , يقولون نسب؟؟ اخاف اقولك تكفرني والله بس اقرا تفاسير الكل مو تركز على جم تفسير عاجبك وتهد الباجي؟؟؟ هذي عيبكم تاخذون اللي تبونه من الدين والفتاوي وتقيسونه عليكم ضبط اوكي وسيع شوي شوفوا فتوه ثانيه على المقاس ماكو وقت نضيج ولا نوسع صح ؟؟ وبعدين الحمدلله المجتمع الكويتي مجتمع حر ومحافظ بنفس الوقت واذا انته فاهم الحريه بمنظور الفسق والفجور طبعاانته وغيرك فالعيب فييك وبتفكيرك وبعدين يا اخي انته داش بقلوب الناس علشان تعرف خشوعه بالصلاة وانه رب العالمين يقبل منه الصلاة ولا لا منو انته اساسا ,, يا اخي انته مو مفتي ولا شيخ عندك كتب دينيه ولا سيد وفوق هذا ما تلبس عقال ,, غريب انته والله



ويقول في فقره ثانيه



ما ضر اولئك «المنافقين» ان تأتي فئة مؤمنة تريد علاج «الشاذين» و«الشاذات» جنسيا في مجتمعنا؟



ايضا على اي اساس خليت اللي يبون يعالجون العادات الدخليه باللجنه فئه مؤمنه واللي ما تبي اللجنه فئه منفاقه ؟؟السيد المهري ذكر انه اللجنه شاذه وتشكيلها بدعه , هل السيد المهري منافق وليش مؤمن ؟؟ اتحداك انك تصرح بالشي هذا وبعدين نفس ما قلنا الشواذ موجودين بكل المجتمعات حتى بالسعوديه اللي الكتاب الأفاضل يبون يحولون الدوله لها موجود فيها ,, والله حتى بافغانستان في جنوس وبلحيه بعد .. مو لايق صح


ويقول الأخ الكويتي بعد



ويقولونها بكل صراحة «لا نريد دولة دينية» فهم يريدون دولة لا يحكمها أي دين، وقد يلبسون على الناس فيقولون «دولة مدنية» لكنها في الحقيقة أي دولة لا تدين بأي دين!! وليس لحكم الله فيها مكان!!أما الفريق الاكبر المتفرج فأغلبه بحمد الله يؤمن بالله ربا وبالاسلام دينا وبمحمد نبيا ورسولا، يعلم أن حكم الله في البشر أصلح الاحكام وأعدلها، وان الشريعة هي مخلص هذه الأمة، ويبشر هذا الفريق بأن دين الله غالب لا محالة، وان اتباع الشيطان سيندحرون ولو بعد حين (والله غالب على
أمره ولكن أكثر الناس لا يعلمون)



صح والله وانا اول من اطالب عدم تطبيق الدوله الدينيه علشان فيها فتن وعدم تطبيق الشريعه صح وبشكل عادل وفوق هذا وهذا دخول الأسلام القفص السياسي واللي نعرفه انه السياسه شي قذر وراح يكون في مصالح شخصيه فوق كل شي وما نبي الدين يتوصخ والله بس وين تفهم الأخوان الشي هذا وبعدين يا اخي انته وربعك ما تبون الدستور واللي فيه مو عاجبكم طلعوا من الديره ليش قاعدين وشتبون فيها ولا الفلوس حلوه ومو اي فلوس خاصه اللي تكون مغسوووله بدم الشعب والناقلات والأموال العامه والمصالح الشخصيه والبريق الأعلامي يكون احلى لما الواحد يحط غتره بدون عقال وما ادري ليش بس جنه سمعت علشان حرام نفس الأيرانيين
ما يلبسون الكرفته , المهم روحوا بره طلعوا خل الكويت ترد ايام عزها وايام الوطن الجمي
ل


يقول الأخ نصيحه حق النائب صالح الملا بآخر فقره


النائب صالح الملا يريد ان يصبح بطلا لكن نريد ان نقول له ان البطوله لا تكون على حساب الأخلاق الفضيله
ايا نائب يا محترم يا من اتهمت مناهجنا الاسلامية بأنها تجعل الابن يكفر أمه لأنها غير محجبة!!... اشتغل فيما ينفع البلدودع عنك هذا الصراخ ضد «لجنة الظواهر السلبية» وابحث عن أمور تنموية تنفع المجتمع، وياليتك تهتم بمعاناة المواطن البسيط بدل التحدث عن الأخلاق!


ما ادري يا اخي ليش محتريين عليه علشان فاز بمركز قوي بدائره فيها اعداد حلوه من الطالبانيين ولا علشان تكلم بكلام منطقي ؟
صح المناهج الأسلاميه بالكويت وتدريسها خطر على العقول فليس كل محجبه كافره وانا اقولك خل نواب الدعاه يشتغلون بالتنميه احسن والله ورفع اسم الكويت وشوفوا الناس وين وصلوا وحنا وين وافقين بسبب تخلفكم يا دعاه الأسلام
واذا تبي كويت الماضي اللي راح تعود كحل عينيك بالفقره اليايه وخل نسترجع الكويت من ايدي دعاه الأسلام المزيف




سلامات عم بوعبدالعزيز وما تشوف شر ان شاءالله


Tuesday, June 17, 2008

مجرد تعليق

أكد أن دورها كبير في معالجة السلبيات
الطبطبائي: الهجوم على لجنة الظواهر السلبية يقصد من تيار معين
استغرب النائب وليد الطبطبائي بصفته الرئيس السابق للجنة الظواهر السلبية الهجوم غير المبرر بحسب تعبيره على هذه اللجنة المكلفة بدراسة الظواهر السلبية الدخيلة على المجتمع الكويتي, الظواهر السلبية التي تظهر بين فترة واخرى وتؤثر على التماسك الامني والاجتماعي والقيمي للمجتمع الكويتي لافتا الى انتشار ظواهر المخدرات والمسكرات والعنف الاسري واستغلال النشء في السلوكيات السلبية الدخيلة على المجتمع
شنو قصد النائب المحترم ممثل طالبان بانه الهجوم يكون من تيار معين على اللجنه المنكوبه ؟؟؟ الأستنكار شعبي للجنه وهالشي صار واقع من الندوات والحملات الشعبيه اللي صارت واللي بتصيير وعن قريب ان شاء الله وكتاب الصحف من مختلف التوجهات ما عدا حبايبنه بجريده الفتن اللي هم المليق والمتميييلق والأملق على وزن الفلم المشهور اذا ما خانتني الذاكره الطيب والشرير والقبيح
المهم انا بسأل النائب ليش اعضاء اللجنه ال 7 من تيار واحد معين ؟؟؟ ليش ما يكون شيعي بينكم او واحد مستقل او واحد قبلي مدام اللجنه لدراسه القيم الأجتماعيه على قولتك؟؟؟ وبعدين استغلال النشء موضوع معروف من مستفيد منه مو احنا ترا انتوا من الدروس الدينيه والحلقات القرآنيه المزعومه وايضا من المعسكرات الصيفيه والمعسكرات الشتويه والمخيمات والسفرات ملوت الجمعيات الخيريه والجمعيات الموخيريه , وخل نكون واقعيين المخدرات والمسكرات والعنف الأسري البويات الجنس الثالث هذي كلها ظواهر اجتماعيه موجوده من زمان وبكل المجتمعات واحنا مو المدينه الفاضله اللي فيها القيم والفضائل كلها وما فيها شي سلبي بس الظواهر هذي لها مؤسسات حكوميه تقدر
تحتويها وتقيم لها دراسات تحل مشاكلها وهني يي دور التربيه ومؤسسات الأجتماعيه التابعه لوزاره الشؤؤون بس انتوا مو هذا هدفكم لا ... تبون قمت الحريات والتمهييد لمستقبل قريب بظهور اللجان اياها اللي تبي المعروف مالكم وتنهي عن منكركم وتبون اسلمه القوانين وتبون فرض الكلمه بس والله على جثتي
مقاله نبيل العوضي بجريده الوطن اليوم شدني فقره حلوه يقول فيها
عندما جمدت الإدارة الأمريكية أموال الشيخين «حامد العلي» و«جابر الجلاهمة» بغير حجة ولا سبب لم تتحرك الحكومة الكويتية ولم يفزع
الحقوقيون ولا نواب المجلس عدا النائب الفاضل «وليد الطبطبائي» والان وصل الأمر للتعدي على أموال الزكاة والصدقات والتي هي ركن من أركان الاسلام، فيا ترى أي ركن بعد الزكاة سينالون منه؟! هل هي الصلاة أو الحج؟! وهل سنظل متفرجين لما يحدث لنا؟!عندما وقفت أمريكا بكل قوتها مع العدو الصهيوني في احتلاله وعدوانه وأمدته بالأموال والسلاح والغطاء السياسي قال بعض الناس «مالنا ولفلسطين» بل صرح بعض «المنافقين» بتأييده لإسرائيل وأمريكا فيما يفعلون في المسلمين واطفالهم!!ولما دمرت افغانستان وقصفت مساجدها وقتلت نساءها وأطفالها واحتلتها قال حكام المسلمين هذه معركة لا دخل لنا بها، بل كنا ومازلنا نساعد عملاء أمريكا داخل افغانستان!!ولما احتلت العراق ومازالت شجع الكثيرون استمرار بقاء «الامريكان» وادعوا أنهم لا يريدون إلا الخير والديموقراطية والرخاء لأمة الاسلام!! بل ان مليون قتيل عراقي في زمن قصير لا يعني للكثيرين أي شيء
الشيخين اللي سميتهم اولهم عنده مشاكل الدنيا بالكويت وعليه رقابه مومن امريك ابس , حتى عندنا بالكويت عليهم رقابه امنيه ورقابه ماليه من الحكومه وصدقني لو الشيطان كان يدري انهم موجودين جان سكر شغله من زمان وتاب حق رب العالمين ,وهذا الشيخ الأول عنده دعوات غريبه للجهاد بالأنترنت ومعروف بالتطرف الغريب والثاني عليه شبهات يا اخي ولا تشوف اللي ييون عنده غدا يوم اليمعه والله اشكال مو من الكويت وما تدري انها موجوده بالكويت اصلا يعني يا اخواني والله هايف يطلع اليسا عندهم شي مو طبيعي وهم اللي سمعته انه لما يروح السعوديه عليه مشاكل يعني حتى هناك عارفينه , وبعدين خل يتصافون الفلسطن اول وبعدين ندافع عنهم , واقول عن نبيل الحين تسولف عن افغانستان ؟؟؟ لما الشيطان الرجيم بن لادن كان موجود مع جماعته وشق الشيعه هناك وكانوا يدخلون بيوتهم ويستبيحون النساء عادي ما تكتبون بس الحين لما الدوله صار فيها ديمقراطيه وربعكم ما يدرون منو طقاقهم الحين قعد نتفرج مممم اتفرج يا حبيبي بعد اكثر , وبعدين بسكم وتقولون العراق المحتل احس انكم كنتم مواللين حق صدام وايد العراقيين مستانسين انه عندهم امريكان واحنا بعد خلهم مو احسن من ربعكم اللي حتى ايام الغزو ما وقفوا مع الكويت ؟؟؟ بسكم نفاق وتدين مزيف يا ناس

Sunday, June 15, 2008

الدين للفرد والوطن للكل


يمكن نظرتي للأمور ما تعجب بعض القراء بس الحريه مكفوله للكل وابداء الراي والمناقشه الموضوعيه اجمل واجمل .. بدايه كلامي راح احط الماده 29 من دستور الكويت وهي
(
مادة 29 )
الناس سواسية في الكرامة الإنسانية وهم متساوون لدى القانون في الحقوق والواجبات العامة لا تمييز بينهم في ذلك بسبب الجنس أو الأصل أو اللغة أو الدين

سالفه انه لا تمييز بينهم للجنس تقريبا والحمدلله انه المرأه خذت حقوقها السياسيه بعد معاناه بسبب التفكير الجامد عند البعض واقصد نوابنا بولحايا والنواب ملوت العادات والتقاليد وبعض نواب المصالح اللي يبون جم بيزه ويساومون والحمدلله مر القانون بس لي الحين في حقوق اجتماعيه سلبت من المرأه ويجب المطالبه فيها وان شاء الله بالبوستات اللي يايه راح نتناولها ..
نروح حق التميييز بالأصل نشوف انه قله من الناس عندهم الشي هذا والحمدلله ونفس الشي للغه ما في تمييز يعني
ساعات تشوف كويتي ما تدري شنو يقول جنه يمني وساعات تشوف كويتي حسبالك كان خباز اول بس اشوه الحين قمنا نفهم بعضنا البعض
خل نيي حق الطامه الكبرى التمييز بالدين وهذا الشي ودي اتكلم عنه بحريه اكثر

( مادة 35 )
حرية الاعتقاد مطلقة، وتحمي الدولة حرية القيام بشعائر الأديان طبقا للعادات المرعية على إلا يخل ذلك بالنظام العام أو ينافي الآداب
لو يينا حق انقسام المجتع الكويتي من ناحيه المذاهب الرئيسيه نشوف عندنا سنه وعندنا شيعه والسنه حسب التقديرات الأغلبيه بس النسبه تقريبا متقاربه ونشوف اللي يدرس بالمناهج التعليميه المذهب السني والغاء تام للمذهب الشيعي
مع انه في اختلاف كبير بالأحكام والأحاديث ومصادرها وتفاسيرها وايضا في اختلاف في تفسير القران الكريم
حتى اخوانا المسيح من الجاليات العربيه او الأجانب او سواء المواطنين اللي هم قله قليله بس واقع ولهم احترامهم وكامل حقوقهم غصبا على اللي ما يرضى واللي مو عاجبه من الأخوه الأعضاء الأشاوس اذا طالبوا ببناء كنيسه لهم وييييه تصير سالفه وليش وما يجوز يا اخي كييييفه مسيحي وله ديانه خاصه وهي سماويه ولها كل احترام وحتى الجاليه البهائيه سوولهم سالفه لما كانوا يبون مسيد لهم مع انهم مسلمين هذيل ترا ويروحون الحج ويصومون بس عندهم احكام خاصه ولهم كل احترام بعد ,والمفروض انه الحكومه تاخذ القرارات وانا اقصد بناء المساجد او الكنائس قرار منفرد بدون الرجوع لمجلس الأمه او المجلس البلدي لأخذ الموافقه تجنبا للفتن وتجنب لبعض الأعضاء المساكين اللي يحبون الكراسي اللي قاعدين عليها ويجاملون بأخذ القرار , وحتى المناهج لازم يلغون منهج التربيه الأسلاميه ولا يدرس وبس كافي عليهم منهج تجويد القران اعتقد انه افيد للكل
كرامه الأنسان الله عز وجل كرمها وخلاه ارقى المخلوقات بالكون بدليل سجود الملائكه لسيدنا ادم وعقاب ابليس كان جهنم من رب العالم لعدم السجود واحنا للأسف كرامه الأنسان عندنا رخيصه وما نحترم الواحد الا لما نشوف اصله وفصله وجنسه وشنو دينه .... تعتقدون ليش العالم ما يحترمنه ؟؟؟؟ يمكن علشان في عندنا اعضاء ملون اللجنه اياها..... اللجنه الطالبانيه

Friday, June 13, 2008

اسفين

مجرد تنويه بالبوست اللي طاف ورد خطأ مطبعي باسم احمد جوهر وانا قصدي النائب حسن جوهر وبس

حارج وغبار .. موشي كلش


عمر المجلس الحالي لي الحين تقريبا اسبوعين ومن النتايج الأوليه للجلسات وتقييم اولي ايضا نشوف انه النواب الأشاوس ردوا موضوع الخمسين دينار وموضوع اسقاط القروض وموضوع الدواوين وعندنا شي يديد وهي اللجنه مالت الظواهر الدخيله والسلبيه على المجتع الكويتي !!! وطبعا بدايه الصراخ والصوت العالي من بعض أعضاء المجلس المعروفين بالصراخ العالي وتخليص المعاملات من تحت لي تحت عند الحكومه
موضوع ال 50 دينار ماله داعي اذا اعضاء المجلس وصلوا حق حل مع الحكومه بدعم السلع الأساسيه فبالتالي راح نشوف انخفاض بقيمه السلع الأساسيه اللي راح تكون مدعومه من الحكومه والتاجر راح يكون مربوط بالشي هذا والمفروض الحكومه يكون لها لجنه من قبل وزاره التجاره تقوم بدور رقابي بحت اذا كان في تجاوز لقيمه السلع بالسوق الكويتي وانا اقصد المواد الغذائيه بالدرجه الأولى صدقوني لو انه الحكومه كانت جاده بالتعامل مع الموضوع هذا والمجلس اللي طاف شوي ركز على دعم السلع جان حتى ال120 مالها داعي
خل نيي حق الموضوع اللي اعتقد عمرنا ما نخلص منه اللي اهو القروض , كلنا واللي عنده قرض وده القروض او حتى الفوايد تطيح بس خل ناخذ المشكله بعقل واحد يحب الديره وما يبي الخراب لها ,,, راح اختصر الكلام واقول لو القانون هذا راح يمر والله بتشوفون بطل الماي يكون سعره دينار كويتي .. لا ومو اي بطل بعد , ماي الروضتين والقيمه الفعليه للدينار يمكن تساوي التومان وبس

سالفه الدواوين مشكلته مشكله يعني النواب ما يحبون يطبقون القانون وعندهم التعدي على املاك الدوله عادي ,, مدام الفرعيات عادي يعني شنو الواحد يحطله ديوانيه مساحتها 100 متر مربع عند بيته ويخلي الصبي موجود ويم الديوانيه شنكو صغير ينام فيه ويمه جنه ما يدري اعزكم الله حمام اللي من الشارع راح تشوف الوزار مال الهندي معلق على الحبل طبعا ,, بس لا عادي المنظر الحضاري للدوله مو مشكله والتعدي على اراضيها هم مو مشكله , وحتى حل الأعضاء انها تكون بقيمه وتدفع عليها رسوم مو حل صح يعني الواحد باجر يسوي الديوانيه شكبرها ويحط اللي يبي فيها ويقول كيفي بفلوسي اشعندك .. المفروض نواب مجلس الأمه اول من يطالبون بتطبيق القانون بس للأسف اللي موجودين ما يعرفون شنو يعني قانون

عاد الحين كله كووم واللجنه هذي كووم , لجنه المراقبه لجنه الوصايه لجنه الأمر بالمعروف والنهي عن المنكر , المشكله شلون باجي الأعضاء سكتوا على اللجنه هذي وما قالوا شي ؟؟؟ غريبه والله بس 4 اعترضوا عليها ؟؟؟ السيد القلاف ما قال شي يعني ولا راح الحمام بالوقت هذا نفس كل مره ؟؟؟ والأخ صالح عاشور حتى ما سأل عن اللجنه هذي وشنو اهدافها ؟؟ وطبعا احمد جوهر كان ناطر مسلم شنو يقول وهو معاه , والأخ لاري كان ناطر سيد عدنان بعد تدرون التبعيات بالمجلس حدث ولا حرج اللي مستغرب امرهم الأخوان الأخ احمد السعدون واحمد المليفي وعبدالله الرومي ماقالو شي حتى ما اعترضوا مع الأربعه والسيد عادل الصرعاوي يمكن عليه ضغوط دينيه بس كان عندي امل يكون على الأقل متحفظ على اللجنه وشنو بتسوي وآلية العمل فيها ,, المهم انه اللجنه راح يكون عليها ضغط شعبي كبير من الكويتيين اللي طول عمرهم يؤمنون بالحريه وانه شعب محافظ بطبيعه حاله ومو محتاج وصايه من اعضاء ما يؤمنون بالدستور الكويتي اصلا
والدليل على اداء المجلس والبدايه الغير موفقه صدور الوثيقه الأخيره اللي سوت ضجه بالكويت وهذا دليل انه الناس اللي ما يحبون الخير للديره هذي وما يبون الديمقراطيه انها تستمر ولا يؤمنون بدستور الكويت بلشوا الشغل والعمل من تحت لي تحت وتحت الغطاء
ديروا بالكم ترا الحارج ياي بالطريج ومو زين حارج وغبار بنفس الوقت

Wednesday, June 11, 2008

التعليم المشترك وحرية الاختيار

راح اواصل اليوم موضوع التعليم المشترك بالكويت , لازم اول شي اوضح الكلام اللي يروجه .. البعض شمعنه نوابنا الأشاوس لما بدوا ملف الجامعات الخاصه ويبون يفصلون ثارت حفيظه البعض مع انه القرار موجود من سنه 1996 بجامعه الكويت ... يا اخوان الموضوع هو ليش فرض نظام التعليم المنفصل بالدوله كلها وانه ما في حريه اختيار النظام من قبل الشعب يعني اللي عاجبه النظام المنفصل يودي عياله ويدخلهم هناك واللي ما يبي في جامعات خاصه توفر نظام التعليم المشترك اللي 90% من دول العالم تطبقه ومافيه مشاكل الا بنظر عيون نوابنا وافكارهم المريضه ... والله وباء

من الناحيه الدستوريه والقانونيه نشوف انه الدستور الكويتي حرص على نصرة الحقوق الفرديه وحمايتها من اعتداء سواء كان فكري او اجتماعي او سياسي واللي يبون نوابنا اصحاب العقول الدخيله هيمنه فكره النظام الطالباني ان صح التعبير بمختلف الجوانب واللي احد جوانبه الغاء التعليم المشترك وهم يبون يكونون اوصياء واولياء على الشعب وتقييد حريته واللي الدستور عطاه الحق هذا بمواده مثل

الماده (7) العدل والحريه الومساواه من دعامات المجتمع الخ
الماده(18) الملكيه الخاصه مصونه فلايمنع احد من التصرف في ملكه الا بحدود القانون الخ
الماده(30) الحريه الشخصيه مكفوله
الماده(36) حريه الرأي والبحث العلمي مكفوله

طبعا هذي بعض مواد الدستور المسانده لحريه وحمايه الفرد بالمجتع الكويتي

واذا بسولف من الناحيه الدينيه ونفس ما قلنا من قبل ما فيييه خلوه شرعيه يا اخي والله ما في بس هذي طبعا لعبتكم التحريف والتفسير بالقران والأحاديث وسهله السالفه عندكم ... اذا عدم الوقوف للنشيد الوطني طلعتولها فتوى للأخ هايف , وبعدين يا اخي التعليم المشترك يساعد الفرد على التعامل والحوار مع الفرد الأخر سواء كان ذكر او انثى يعني لما يتخرج الواحد ما راح يكون معاه بالشغل وحده او لما تتخرج البنت ما راح تتعامل مع واحد كلش بحياتها والله حتى المدرسات لما يسوون اجتماع اولياء الأمور نشوف الرياييل يروحون اكثر من الحريم بس ما اقول الا اخ والله على المرض اللي حايشكم ,,, وبعدين يا اخي احنا يالله عندنا جامعه وحده حكوميه وكل كليه بمنطقه ووين ووين تلقه عند دكتور سنع تاخذ عنده شلون تبي تطبق الفصل بعداله ومساواه والله ما يصير بالعقل ما يصير بس هم ارجع واقول عندكم عقل انتوا ؟؟؟والحين ودي الكل يشارك بحمله منظمه نطالب فيه بدعم الحريات وحمايتها من الفكر الغوغائي الموجود للأسف عند اشخاص المفروض انهم يمثلون الأمه والشعب وخل نبديها بحمله للتعليم المشترك وادعوا الكل للأنضمام بتجمع صوت الكويت اللي من خلاله على الأقل تقدر نوصل رساله للنواب انه احنا شعب حر والدستور كفل
لنا الحقوق كلها وما نبي وصايه من احد ,, والسلام ختام
اللي يحب يدش على موقع صوت الكويتhttp://soutalkuwait.com

Tuesday, June 10, 2008

شر البليه ما يضحك

البذالي: لم أقصد تجنيد الشباب بالمعنى الحقيقي
!!!!!!!!
وعلمت «الجريدة» أن البذالي أكد أمام قاضي التجديد أن الحديث الذي نشرته صحيفة «الوطن» بعد لقاء أجرته معه وتحدث فيه عن تجنيد الشباب «تم تسجيله مع الصحيفة في شهر يناير الماضي وقامت بنشره بعد وفاة المواطنين في العراق قبل نحو شهر». وقال: «على المحكمة استدعاء الصحافي ليتضح أن تسجيل اللقاء كان في شهر يناير، كما أنني لم أقصد مفهوم تجنيد الشباب بالمعنى الحقيقي، وأنا دائما أقدم النصيحة لهم
ممكن يعلمنه الداعيه المجاهد اللي والله لي الحين مو قادر اميز ملامح ويه شنو يعني التجنيد والجهاد بالمعني الحقيقي؟؟؟ وجان زين يقولنا النصائح المثمره اللي يقدمها للشباب ؟؟؟؟
إليسا تغني في الكويت بموافقة الإعلام في حفل خيري لمرضى السرطان وبرعاية ناصر المحمد
بعد حال ارتباك وتردد عاشتها وزارة الإعلام بضعة أيام، قررت الوزارة الموافقة على أن تحيي الفنانة اللبنانية إليسا حفلاً غنائياً «خيرياً» في الكويت لصالح جمعية مرضى السرطان اللبنانية، وبرعاية سمو رئيس مجلس الوزراء الشيخ ناصر المحمد
في امكم خير منعووها

Monday, June 9, 2008

يا شينهم من لحى

هايف يطلب مراقبة ألعاب الفيديو! الظواهر الدخيلة تصوغ ضوابط للحفلات الخاصة


عقدت لجنة الظواهر السلبية البرلمانية أمس لقاء مع وزير التجارة أحمد باقر والوكيل المساعد لشؤون المطبوعات طارق العجمي للاستماع الى إجراءات الوزارتين حول استضافة فندق لقاءات برنامج «ستار أكاديمي»، وإقامة حفل المستشفى في قاعة خاصة بفندق آخروقال رئيس اللجنة النائب د. جمعان الحربش إن أعضاء اللجنة طلبوا تقييد الحفلات الخاصة في الأماكن العامة، لافتاً الى أن خروج الحفلات الخاصة من نطاق المنزل يعني دخولها في الأماكن العامةوأضاف الحربش أن اللجنة بصدد وضع ضوابط للحفلات الخاصة، مشيرا الى أن الهدف ليس قمع الحريات الخاصة بل مراعاة العادات والتقاليد وقيم المجتمعكما ذكر الحربش بصفته رئيساً للجنة الداخلية والدفاع البرلمانية أن اللجنة ناقشت في اجتماعها أمس أوضاع كلية علي الصباح العسكرية، إضافة إلى قضية إطلاق لحى العسكريين، مضيفاً أن الاجتماع المقبل للجنة سيكون بحضور وزير الدفاع، معرباً عن أمله في ألّا تكون كلية علي الصباح مكاناً لتلقي الرواتب فقط
وفي سياق متصل، قال عضو لجنة الظواهر الدخيلة محمد هايف المطيري عقب اجتماعها أمس، إن اللجنة ناقشت مع مسؤولي وزارة الإعلام بعض المواضيع المتعلقة بدور الوزارة في محاربة الظواهر السلبية، مبيناً أن اللجنة أوضحت لمسؤولي الوزارة أن هناك قصوراً في أداء الوزارة في ما يتعلق بمتابعة المصنفات الفنية وألعاب الفيديو التي تتضمن إساءات وصوراً فاضحةورداً على سؤال عن الإنذار الذي وجهته الوزارة إلى قناة «LBC» في الكويت حول برنامج «ستار أكاديمي»، قال هايف: «لم يكن الإنذار كافياً، فالمطلوب لائحة واضحة يتم من خلالها معرفة الفعاليات التي تجرى من قبل أي وفود إعلامية زائرة حتى لا تعقد فعاليات أو اجتماعات تضر بسمعة الكويت
بدينا والله , لا وبدينا باليهال ...بألعاب الفيديو!!! والله عيب عليك يا هايف صج انك هايف والله ألعاب البلي ستيشن والجييم حق اليهال والحين العطله يايه تبي تشوف لهم ضوابط؟
والثاني يبي ضوابط للحفلات الخاصه والله قتلكم بالبوستات اللي طافت والله يبون يحطون ناس ملوت الأمر بالمعروف والنهي عن المنكر من رياييل وحريم والحريم طبعا يحطونهم بالفنادق وصالات الأفراح حتى عروس الحريم راح يكون فيها ضوابط ما في رقص ما اغاني حتى يلوى ما في بس تبحلقون ببعض ولما العروس تدش راح تقولون بصوت واحد وعالي ما شاء الله تبارك الله وبس غير هذا ماكو مع انه العرس بس حريم
بس ها لا تحاتون رئيس لجنه الظواهر الأخ الحربش يقولوكم ترا هذا مو يعني قمع للحريات لا والله مو قمع الا نسف
بس اهم شي يبون يناقشون موضوع اطلاق اللحى للعسكريين والله الموضوع مهم وتبون الصج التنميه والتطور اللي ناطرينه للديره ورقي الديره بجميع المجالات تنطلق من اطلاق اللحى ,,,, يا شينهم من لحى والله

Sunday, June 8, 2008

التعليم المشترك والفكر المريض

التعليم المشترك صارت قضيه حساسه للكل ونفس ما يقولون قضيه الموسم , واعتقد انها راح تكون المكسب الحقيقي للشعب اذا حب انه يتمسك بالدستور وحقوقه اللي اوجدها الدستور نفسه , بالنسبه حق اللي يطالبون بعدم جواز التعليم المشترك ولهم مسميات ماله شغل اساسا بالتعليم المشترك مثل الأختلاط , بذمتكم شنو يعني الأختلاط؟؟؟؟

من اول ما تأسست الجامعه بالكويت والتعليم بالكويت كان مشترك , واللي موجودين بالمجلس من مختلف مذاهبهم الدينيه وتوجهاتهم السياسيه هم تخرجوا من جامعه الكويت وكانوا يدرسون بنظام التعليم المشترك , طبعا مو كلهم في ناس من المرحله المتوسطه ووقف وصار عضو مجلس امه علطول

للأسف العقول المريضه اللي تنادي بوقف التعليم المشترك لها اهداف ومكتسبات سياسيه اكثر منها دينيه وانه لها علاقه بالشريعه , يعني لو انه كلامهم صح عيل خل نفصل بينهم بالوزارات والهيئات الحكوميه والأهليه وخل نسوي يوم حق البنات ويوم حق الشباب لدخول المجمعات , والمطاعم يوم نسويها للبنات ويوم للشباب ... اي اي وخل نسوي شارع الخليج يوم يمرون فيه البنات ويوم الشباب ولا اشرايكم نصير نفس السعوديه وما نخلي البنت تسوق سياره احسن
وجذي السواق عندنا يكثرون ويكون نسبه الهنود 4 اضعاف الكويتيين ولا بتيبون فلبينيات بدل الرياييل علشان محرم يعني
ما ادري شيبون وشنو يبي يصير بالديره , ترا مدام بدوا بالقضيه هذي راح يتمادون اكثر واكثر والله

واللي يبط الجبد انه اغلبيه النواب اللي يبون الفصل موديين عيالهم شباب وبنات بره الكويت على بو الجامعات افضل يا اخي المجتع هناك متفتح اكثروالجماعات فيها تعليم مشترك ما عندهم جامعه للبنات وجامعه للشباب تصدقون حتى ايران اللي ماتسمح للبنت تطلع الا وشي على راسها ولبس طويل عندهم شي اسمه تعليم مشترك ,, بس لا حلال عليهم حرام على الشعب
ليش قلوبنا صارت مريضه وعقولنا تروح بعيد بتفكير مو حلو , ليش الواحد لما يشوف وحده مو متحجبه واقصد منهم يقول استغر الله الستر زين ؟؟؟؟ شنو يعني المتحجبه او المنقبه ملاك الحين ؟؟؟؟ التربيه اساس كل شي يا ناس مو اللبس او المظهر واذا الستر راح ينقاس باللبس او المظهر الله يعوض على تفكير الشعب , اساس العلاقه بين الرجل والمرأه اساس اجتماعي احنا بعقولنا نديره ونتحكم فيه وطول ما في احترام وفي تربيه راح تكون العلاقه محترمه
وعلشان عقولكم مريضه ما ادري شنو ببالكم والله بس لما تسوون ندوات عادي عندكم الحريم جدامكم
بس ها تكونون انتوا الموجودين بس ,, لا لا الصحافه والتلفزيون بعد صح؟ واكيد شويه منظمين وبس والباجي حريم جذي مو حرام وما فيها شي ومو اختلاط بخيمه وحده , بس لما دكتور اكاديمي موجود بقاعه وعلى يمينه طالبات ويساره طلبه وبينهم مسافه ويحاضر لا ما يصير حرام وخلوه شرعيه فيها

حتى السلف ما شفنه يعني الواحد يحطله شاشه ويحاضر بدون ما يشوف الحريم ؟؟؟؟ مو جذي افضل واحسن من ناحيه الدين مالكم ؟؟؟؟ ترا الدين مالنا ومال الشعب الكويتي اهو الأصل هو دين الأسلام هو دين الوسطيه والتسامح مو دينكم اللي دخلتوه بالسياسه وشكلتوه على كيفكم على حسب مصالحكم
بس كافي تزييف باسم الدين , وكافي ضوابط دخيله على المجتع الكويتي اللي انتوا تبونها .. ولنا تكمله مع التعليم المشترك

Saturday, June 7, 2008

!!والله عييب



25


عملية جراحية ضرورية أجّلها الأطباء بعد تعطل أجهزة التبريد في ابن سينا والبحر والبابطين.. المشهد يتكرر يومياً.. والسبب إهمال ملف الصيانة
التكييف.. يمرًّض مرضى مستشفيات الصح
ة
والله عيب .. ديره نفس الكويت بعوائد ماليه خياليه يوميه وشعب توه يحتفل انه وصل المليون نسمه ويصير جذي عندنا بالصحه اللي تعتبر من اهم اولويات اي دوله واي مجتمع ... يالله وين نواب لجنه الضوابط الخاصه والغريبه على المجتمع الكويتي خل يتحركون شوي مو الشي هذا غريب ويعتبر من الأشياء الدخيله على مجتمع عنده وفره ماليه مهوووله ؟؟؟ مراوح والله حتى بالجليب ما تشوفونها الحين على الأقل يحطون كنديشن مستعمل ... وحتى الجراح اللي اكتشفوا انه مزور اوراقه اشوف ما سووا الجماعه حمله اعلاميه كبيره وضجه وتصريح من هذا وذاك بس فالحيين حق الحفلات والأشياء الخاصه اللي ما تودي ولا تييب ,, بس والله الشرهه مو عليكم على اللي وصلكم


Friday, June 6, 2008

حتى الرياضه فيها حلال وحرام؟؟



يستضيف برنامج «نظرة شرعية» اليوم على شاشة «تلفزيون الوطن» اليوم الشيخ الداعية سليمان الحبيلان في حلقة خاصة عن أخلاقيات الرياضة، ومن المقرر ان يدور النقاش عن التعصب الرياضي وما يحدث بين مشجعي الرياضة من ممارسات غير أخلاقية، كما يتناول البرنامج موضوع التقليد الأعمى المصاب به بعض الشباب من تقليد موضة قصات الشعر ولباس وحركات اللاعبين، ويتحدث الشيخ الحبيلان عن خطورة اهمال الصلاة بسبب الرياضة، وفي السياق ذاته يتطرق الحبيلان الى موضوع الرياضة النسائية وما يصاحبها من مشاكل شرعية وأخلاقية، كما يعرض الشيخ نصيحة لمحبي الرياضة وللرياضيين بشكل عام.يذكر ان البرنامج يبث في تمام الساعة الواحدة ظهرا من خلال شاشة «تلفزيون الوطن» وهو من تقديم الشيخ طلال فاخر واعداد مشاري العنزي ومن اخراج احمد عزب.تاريخ النشر: الجمعة 6/6/2008

شفتوا الصوره والكلام المنشور بجريده الوطن وبرنامج نظره شرعيه اللي يعرض علىتلفزيونهم
عجييييب والله حتى الرياضه فيها حلال وحرام ؟؟؟ ريااااضه يا ناس وتشجيييع هم فيها
تقليد اعمى للغرب ؟؟؟؟ قصه الشعر والملابس للشباب فيها نظره شرعيه بعد ؟؟ التعصب الرياضي فيها ممارسات غير اخلاقيه ؟؟؟؟ رياضه الجنس الناعم حرام؟؟؟ انتوا الحرام والله وحرام عليكم تبثون السم وتسممون افكار حلوه وهوايات مثل الرياضه وتدخلون فيها الحلال والحرام .... وبس

Wednesday, June 4, 2008

منو حطكم اوصياء؟؟

مشلكه النواب اللي حسبالهم انهم اوصياء على المجتع الكويتي يتكلمون حتى بخصوصيات الناس , يعني الحفله اللي سوتها اداره المستشفى الخاص باحدى الفنادق واللي ممن المفروض تكون حفله خاص.. سووا منها مشكله ومحاسبه وتضخيم للأمور , يا خوفي باجر اسوي عيد ميلادي واييب هيفاء وهبي وتكون القضيه مدرجه على جدول اعمال مجلس الأمه بس تعتعقدون منو راح يحاسبون ؟؟؟؟ ما عندي وزير ولا منصب ولا شي , راح يحاسبون منو ؟؟ رئيس الوزراء يمكن ؟؟ ما ادري
دخلتوا قاعه عبدالله السالم بالديمقراطيه واقسمتوا للدستور والمشكله ما تبون تطبقون ابسط اللوائح و القوانيين الموجوده فيه واللي تكفل للمجتع و الفرد الحريات , اذا انتوا ما تبون الدستور ولاانتو مؤمنين فيه لا تدشون ,, بس لا الكرسي حلو مع البشت واللحيه صح؟
المفاوضات مع الحكومه حلوه يعني يمكن فيها جم مليون اسكر حلجي فيهم واروح بالصيف شاطئ العراه او اجنس عايلتي واصوت مع المره بحقوقها السياسيه مو ايمانا مني بالشي هذا بس علشان استفيد واخذ اللي ابيه وبعدين باللعنه ما ابي ادش ولا انجح ,اصرخ على هذا وذلك وباجر يقولون شوفوه سبع وله الجنه صح؟
ما نبي وصايا من احد يا اعضاء , ما نبي لجان تشوف اشياء دخيله على مجتمعنا تدرون ليش؟
انتوا الدخلاء على المجتع هذا , شنو تبون ما ادري ؟!! واحد ما يوقف حق السلام الوطني ويلعب بتلفونه يعني حتى مو قاعد على الأقل بحترام للنشيد ورمز الدوله ويقولون يا اخي حريه شخصيه ؟؟ هاااا الحين هذي حريه شخصيه صارت ؟؟؟ او يطلعون فتوى انه مايجوز الوقوف وهذا من عمل الكفار والتشبه فيهم ؟؟ في ريال منكم يقولي الأمراء والملوك يوقفون يعني هم تشبه في الكفار ؟؟؟؟ محد يقولها فيكم ولا يتجرأ واحد فيكم على الشي هذا صح؟؟
المشكله انه حدكم الصلاه والصوم وتروحون الحج والعمره مثل باجي الناس بس شنو اللي يميزكم عن باجي الناس علشان تكونون اوصاء عليهم؟!! بس كافي..... وصدقوني راح تشرق شمس بالكويت اللي دايما معروف انها شمس الحريه وارد و اقول الكويت راح تكون وطن اجمل

Tuesday, June 3, 2008

الله بالخير

الله بالخير على الكل ..
تبون الصج كنت متردد اكتب اول شي ويكون عندي مدونه بس الوضع السئ الي قعد اشوفه او نشوفه كلنا خلاني انفجر وودي اطلع اللي بداخلي
بالبدايه لما نشوف نتايج انتخابات مجلس الأمه الحالي والله الواحد يخترع من الأشكال ...الكل يقول من اصحاب المدونات المحترمين الشرهه على الناس اللي اختارت الأشكال هذي وهذا الكلام صح نسبيا .. بس تعالوا انا عندي تحليل متواضع يمكن يعجبكم , خل نشوف حدس.... الخساره بالأنتخابات الحاليه لهم كبيره والله .... بالنسبه حق مرشحينهم بالدائره الثانيه نشوف انه دعيج الشمري حصل على 3411 صوت ,بينما حصل جمعان الحربش على 6396 صوت
.. يعني حدس لها ثقل تقريبا ب 3000 صوت واللي ساعد جمعان الحربش بالنجاح قبيلته اما الدائره الثالثه فكان من المتوقع نجاح علشانهم .. قصدي الشايجي والصانع بس لو التحالف شاد حيله شوي ومركز على اسامي صح راح يكون كلام ثاني .. المهم
نروح حق الدائره الأولى اللي اثبت فشل الحركه في وصول جمال الكندري اللي كان نجاحه بالسابق واضح مع عدنان عبدالصمد
اما بالمناطق القبليه اعتقد انه مالهم وجود نيابي
السلف اللي الكل يقول من 5 مرشحين نجحوا 4 وهذا انجاز , بس تعالوا هم نحسب الأرقام الموجوده بالدائره الأولى واللي فاز فيها د. محمد الكندري وحصل على 6228 وحسب الارقام نعرف انه الكنادره يمثلون نسبه كبيره تقريبا 4000 صوت
نقدر نقول تقريبا نص الرقم اللي يابه الدكتور اذا مو اكثر بشوي يعني العايله اهي المساعد الأول وبعدين التوجه السلفي + علام الكندري كبونص يعني فوق البيعه
تعال للدائره الثانيه المرشد الروحي مال السلف ياب 8657. صوت.... والتابع له اللي كان رئيس جمعيه القادسيه ياب 5246 صوت
يعني في فرق 3411 صوت........ يعني منو منهم يمثل قادعه السلف ؟؟؟؟ ومنو اللي اسمه ساعده وتجارته وعلاقاته شالته
خل نيي حق على العمير ,, الكل يقر انه في تحالفات خفيه صارت بين السلف وبين حدس حتى لو احد الطرفين ينفون الشي هذا بالعلانيه بس ما يقدرون حبايب هذيل من ايام المخيمات عندهم تبادل بكل شي .. عاد تبادل شنو غير الأصوات ما راح اقول هم انتوا تفهمونها وهي طايره
اللي ضاع بالطوشه اللي بالرابعه علي دخيل العنزي اللي ياب 6082 اعتقد انه قاعده السلف تمثل 25% من اصواته ... وهم لا ننسى انه هو من قبيله العنزه اللي لها ثقل كبير بالدائره الرابعه اما نواب الأحباط باستثناء الدكتور فيصل المسلم والأخ عادل الصرعاوي فلو نشوف من وين ياي نجاحهم ؟؟؟؟
الفرعيات ثم الفرعيات ثم الفرعيات بس ما عدا محمد هايف المطيري اعتقد ياي من قندهار ودخل قاعه عبدالله السالم
فبالتالي خل نتفائل شوي بالأعضاء مثل صالح الملا ومحمد العبدالجادر وعلى الراشد ومحمد الصقر والعم بوعبدالعزيز اللي اتمنى من كل قلبي انه يكون صلب مثل ما عهدناه وكل احترامي للأخ عادل الصرعاوي اللي احترم خطه الوطني
عيل خل نقول ونطبق شعار ... شاركونا الأمل لوطن اجمل .... ولنا حديث اخر