التهويسه والدبكه حلال

المشهد اللي حطووه قناة سكوب قبل جم يوم من تهويسه ودبكه فلسطينيه مع بعض أعضاء مجلس الأمه من الاخوان في الحركه الدستوريه وربع الراحل مغنيه كان شي يضحك فعلا , بالنسبه لي اللي شفته واللي حصل شي متوقع .. الوالد اليوم قالي هذيل صج ما يستحون ليش سوو جذي ربعنه ؟؟ وقصده الوالد طبعا بربعنه مو حدس اكيد .. :)

قتله عادي يبا .. الولاء والانتماء للدول الاخرى يفرض عليهم الرقص والتهويسه والدبكه وهز المكوه بعد

..

في بدايه الحرب العراقيه الايرانيه والجماعه اياها يحطون الشيعه بمواقف صعبه ومحرجه فعلا .. بعض التفجيرات اللي فعلا كان لهم مشاركه فيها .. ودم ال 16 شهيد واللي اجزم واقولها على ذمتي انه دمهم برقبة اللي طلع منها بواسطه واعجوبه واليوم نائب مجلس امه .. وتأبين مغنيه ... والحين وقوفهم مع حماس بطريقه مضحكه .. المصيبه كل هذا ولما تقترح عليهم شرايكم نسوي مسيد للشيعه بالمنطقه الفلانيه واللي يخدم 5 او 6 مناطق حواليها ؟؟ يقولون احنا تيار وطني , وما نبي تفرقه , ليش يبا تبون مسيد احنا كلنه كويتيين , عجيييب والله

اما الاخوان في حدس اثبتوا فعلا انه اليباب حلال .. ومشاركه الحريم بأي احتفاليه شرط اللبس الاسلامي حلال .. ورقص الرجال وان كانوا رجالا ايضا امام الحريم حلال .. وارضاع الكبير من ثدي زميله له بالعمل حلال , بس التعليم المشترك حراااااام , وبناتكم يدرسون بره عادي .. والربا حرام , وفلوسكم ببنوك خارجيه تحصد الملايين عادي .. وحلق اللحيه حرام , واللحيه عندكم مجرد قناع تستخدمونه متى ما تبون

..

والله فعلا احنا بزمن غريب .. وما غريب الا الشيطان

منو يسبق؟؟

استجواب حدس غريب ؟؟؟!!

استجواب سمو رئيس الوزراء فعلا اصبح اضحوكه عند الكل , كل واحد يبي شعبيه يستجوب ناصر المحمد والشي هذا كان من قبل الانتخابات السابقه حتى .. بس الغريب انه حدس اهي اللي تبي تستجوب ؟؟ بنت الحكومه اللي مالها حس وبالغصب تسمع صوتها واللي صار عمرها اكثر من 30 سنه تدللها الحكومه بكل شي .. اهي اللي تبي تستجوب !!

اعتقادي الشخصي والبسيط استجواب حدس الغريب كان مخطط له قبل التشكيل الحكومي الاخير واللي صرحت حدس بعدم الرغبه بوجود من يمثلها بالحكومه , بس لازلت استغرب الاستجواب .. وقعدت افكر وافكر ليش؟؟

وصلت انه سبب الاستجواب اما باتفاق مع الحكومه لتسهيل الحل اللي كان المفروض يصير باستجواب الثلاثي المرح واللي اعتقد انه تأجل بسبب القمه الاقتصاديه والرغبه بنجاح هذي القمه وبالتالي حدس تستعيد قواعدها على الاقل بمقعد او مقعدين زياده مع وزير بالحكومه اللي راح يترأسها ناصر المحمد مره ثانيه وترد العلاقه المدللة مره ثانيه .. او لظهور جيل جديد شبابي داخل حدس فعلا يرغب باصلاح ما تبقى من مسمى الدوله الحديثه وله نظره شموليه وحزبيه صحيحه بالتعاون مع الكل لمصلحه الدوله على عكس الجيل القديم اللي كان همه الوحيد محاربة التيار الليبرالي فقط والتركيز على اخذ المقاعد القياديه بجميع مؤسسات الدوله ..

بس مهله 6 اسابيع وايد على محاور الكل اصبح يعرفها اساسا لاي جهه راح تستجوب سمو رئيس الوزراء , بس اعتقد المليفي راح يسرق شرف تقديم الاستجواب من حدس بنهاية الاسبوع الا اذا يسحبون جم جنسيه مره ثانيه من اللي مو مشتهيهم الاخ المليفي وبالتالي يطلع مره ثانيه بمؤتمر صحفي داخل القاعه وبيده ورقه ويقعد يقول كلام منمق حلو ماراح تفهم منه شي

عموما ما راح نستبق الأحداث واللي بالجدر يطلعه الملاس واعتقد اغلبية نوابنه الافاضل صاروا ملاليس بجدر الحكومه

تنحي سمو رئيس الوزراء بات واجبا وليس مستحبا حتى ... لمصلحة الديره خلونه نتعاون ونساهم بالحل .. وطبعا قصدي حل المشاكل

نقطه خارج المضوع تكفون بسنا هلا فبراير وقلبي طاير ... ترا اللي نشوفه واللي يسمونه مظاهر احتفال تفشل ..
احتفال عيد نوروز بايران وشم النسيم بمصر واااايد احلى ... اي وقرت عينكم لرجوع البطل المغوار النائب الاصلاحي السباح الماهر المجاهد الحماسي السيد طبطب من غزه ... كنت احاتييه عاد

فليشهد الثقلان أني رافضي

بس يمكن علشان تكلمت شوي عن المذهب الشيعي بالبوست اللي طاف ادري انه الكثير منكم فكر بيييه هذا طلع طائفي وهو يدعي الوطنيه ويبي وطن أجمل وكلام الكتب والشعارات الرنانه هذي .....

صدقوني انه انا من اشد المطالبين لوجود مجتمع مدني ودوله علمانيه لاني مؤمن ومقتنع بعدم وجود الدوله الاسلاميه الصحيحه والمشرع الاسلامي العادل واللي له القدره الالهيه على تطبيق الشريعه الاسلاميه الصحيحه الى ظهور الامام المهدي ( عجل ) .

للاسف البعض يشوفون مفهموم الدوله المدنيه والعلمانيه على انه لازم تحرر واسفاف والحاد بالله ووجود خمر وحريه ليس لها حدود .. علشان يطلع جدام الناس انه مثقف وعلماني ويبي دوله ديمقراطيه ومجتمع مدني صحيح ..!!!! وطبعا هذا من مفهومه السطحي التافه ..

وودي اوضح شغله عن نفسي .. لما السالفه تكون اختيار العقل والايمان بالله ومذهب اهل البيت فأنا اكيد راح اختار منهج الائمه لانه هذا دين وايمان وهني يكون موضوع العقل فيه منتهي الصلاحيه امام الايمان بالله والعقيده الصحيحه وهي عقيده اهل البيت عليهم السلام بنظري

يقول الامام الشافعي وهو احد المذاهب الاربعه للسنه

ياراكبا قف بالمحصب من منى واهتف بساكن خيفها والناهض
سحرا اذا فاض الحجيج الى منى فيضا كملتطم الفرات الفائض
ان كان رفضا حب آل محمد فليشهد الثقلان أني رافضي


وقال ايضا ...

لو شق قلبي لألفوا به سطرين قد خطا بلا كاتب

العدل والتوحيد في جانب وحب آل البيت في جانب

خلونه نتكلم بصراحه شوي

مساء الخير للجميع .. مواضيع وايد صارت بالديره وللاسف ما كتبت عنها شي .. ولا ابديت رأي المتواضع فيها .. وودي الحين اسولف عنها شوي اذا سمحتولي ....

طبع اضحكني التجمع اللي صار بساحه الاراده علشان غزه .. والاخ طبطب رافع عقاله وجوتيه مع انه بنظري نفس الشي الاثنين .. ونبيل العوضي يتكلم بأسى وحاول كثر ما يقدر انه يبجي وتدمع عينه على غزه ودعوته للجهاد .. ترا باب الجهاد مفتوح والطريج لغزه ما يفرق عن العراق وافغانستان وايد بس الظاهر دم الشيعه اولى من اليهود بنظر قوم طالبان !!!!


واعتقد انه هفهف ما كان عنده وقت ولا تعليق عن غزه لأنه مشغول بمراقبة الحسينيات .
استغرابي الاكثر من بعض المدونين اللي يدعون الوطنيه وبين الوجه الحقيقي لهم وعقدتهم للمذهب الشيعي واعتقد انه تخوفهم للمد الشيعي , مشكلة بعض الناس لما يتكلمون يربطون الشيعه بايران وانا مو بصدد الدفاع عن ايران ولا من محبي ايران اصلا بس يا اخي اقرى التاريخ الاسلامي وشوف اصول المذاهب الاربعه من وين ... من فارس .. مو من الجزيره العربيه ,, يعني مو من عيال بطنها

المفسر جارالله الزمخشري وهو من كبار مفسري القرآن للسنه وكتابه الكشاف يقول ..

اذا سألو عن مذهبي لم ابح به وأكتمه, كتمانه لي أسلم
فانه حنفيا قلت, قالوا بأنني ابيح الطلا وهو الشراب المحرم
وان مالكيا قلت, قالوا بانني ابيح لهم اكل الكلاب وهم هم
وان شافعيا قلت, قالوا بأنني ابيح نكاح البنت والبنت تحرم
وان حنبليا قلت, قالوا بأنني ثقيل حلولي بغيض مجسم
وان قلت من أهل الحديث وحزبه يقولون : تيس ليس يدري ويفهم
تعجبت من هذا الزمان واهله فما احد من ألسن الناس يسلم
وأخرني دهري وقدم معشرا على انهم لا يعلمون وأعلم

وللحديث بقيه

دعوه من تجمع صوت الكويت

يسرنا دعوتكم لرابع فعاليات حملة "الحرية مسؤولية" والتي نقيمها بالتعاون مع جمعية الخريجين ومجموعة مبدعون وهي عبارة عن تجمع سلمي صامت يوم السبت 22 من نوفمبر ،من أمام الصالة 6 في أرض المعارض للتأكيد على حرية القراءة والكتابة والبحث - كن معنا منذ الخامسة عصراً - واحضر "كتابا" انت تختاره لـ قراءته تعبيراً عن أهمية الكتاب/المعرفة الحرة

http://www.youtube.com/watch?v=0NyrF-nmlkY

حلها .. تكفه

الحين ودي افهم منو بالاستجواب هذا يثير الطائفيه ؟؟؟

وخلونا نبتعد عن الطائفيه شوي ونكون عقلانيين السيد الفالي عليه قضيه .. بس ما حكم فيها للحين وله اقامه صاله اعتقد بحسب ما قريت من وسائل الاعلام لنهايه 2011 .. يعني المفروض انه يكون موجود بالكويت للحكم فيه .. والقيد الامني اللي عليه اذا كان ممنوع اصلا من دخول البلاد فعليه التواجد بالمطار لما يشوفون له طياره تروح اي مكان ان شاء الله تروح جزر المالديف بس ما يدش ارض الكويت لانه ما يجوز قانونيا الدخول .. اما اذا مسجل في حقه قضيه فراح يعامل كأي وافد وينطر الحكم النهائي وبس ..

وشدخل رئيس الحكومه بالاستجواب اصلا؟؟؟ ليش مو وزير الداخليه ؟؟ الظاهر تعليمات الاخ ابو القبضه الحديديه صارمه وواضحه للثلاثي .. وعلى طاري الثلاثي ما ادري ليش حاشر نفسه المطير بينهم ؟؟

يعني مو سلفي او محسوب لتيار ديني ؟؟ او يمكن علشان ويه بالنسبه حق طبطب وهفهف يطلع نانسي عجرم ؟؟

يمكن .. مع انه انا مع استجواب ورحيل رئيس الحكومه بس السبب تافه جدا جدا

ويمكن علشان السبب تافه راح يقدمون الاستجواب وينحل المجلس وتصير انتخابات ونشوف هالاشكال مره ثانيه ونكون كالعاده ما استفدنا شي ابدا ...

تعبنا ونقول حرام عليكم اللي تسوونه بالكويت ... تعبنا ونقول خلونا ايد وحده ندير البلد مع الربان العود ونرد ايام العز للكويت ...

بس نوابكم وحكومتكم صمخان .. حلها بوصباح وفكنا .. الديمقراطيه اصبحت طائفيه

خلونا نكون صوت الكويت

مساء الخير ..
لما دزيت حق بعض الاخوه المدوينين دعوه للمشاركه والحضور باحتفالية يوم الدستور اللي نظمه تجمع صوت الكويت .. اكيد كنت متوقع انه بعض الاخوه راح ييون وما راح يكتب نقده او مدحه والبعض الاخر ما راح يهتم وفي ناس راح تيي وتكتب النقد البناء ...

بس انه الواحد ينحط لمستوى هابط ويعلق على صلعه الاستاذ احمد الصراف مثلا او يعلق بسخريه وكلام يدل على مستواه الفكري .. فهذا شي ما توقعته ابدا .. صحيح انه في بعض المدونات تختلف بالراي ووجهات النظر والفكر الثقافي او السياسي او حتى الاجتماعي .. بس اعتقد عالم التدوين يتميز باحترام الآراء البناءه واللي تخدم شتى المواضيع المطروحه ..


وكأي احتفاليه بمكان عام ومفتوح لتجمع انشاءه ما تجاوز مدة الستة اشهر , لازم يكون في اخطاء من حيث التنظيم والترتيب , بس المهم انه مضمون الرساله وصلت للكل وهي عظمت دستورنا الكويتي وتمسكنه وايمانه التام فيه.

تجمع صوت الكويت حب يذكر الناس بدستوره بطريقه جميله وهي كرنفال مصغر اسري لجميع المراحل والاعمار للمشاركه بيوم الدستور ... سهل على اي تجمع او جمعيه نفع عام او حتى اشخاص عمل مؤتمر وبيان وندوات وكراسي وستاند وكل واحد يتكلم ربع ساعه وخلصت الندوه وبس وسوينه اللي نبيه ... بس اللي صار غير عن جذي .. كانت احتفاليه جميله بأركان مثل الشعر والقصه القصيره والموسيقى الوطنيه وايضا فيها المشاركات من اشخاص حبوا يلقون كلمه بالمناسبه هذي .. وركن للاطفال وايضا لوحه للتعبير عن راي الحضور وتوصيل رساله لأعضائنا الموقرين اللي ناسين هموم الديره وعندهم قضايا تافهه شاغلتهم ..

هدف التجمع وتحصيل النتايج المترقبه من انشاءه ما راح يي بعد شهر او شهرين او حتى سنه ... صدقوني التجمع بعيد عن الاحزاب السياسيه جميعها .. هدفه الحفاظ على الحريات باطار الدستور .. تثقيف جيل المستقبل وتوعيته لانشاء مجتمع مدني قوي ونكون في ركب الدول المتقدمه .. واللي اعتقد احنه في مؤخرتها مقارنه بدول المنطقه

نبي انتقاد هادف لتصحيح المسار .. وصدقوني النقد قبل المدح .. التوجيه .. المشاركه الفعاله .. خلونه كلنا نكون صوت الكويت ... علشان احنا فعلا صوت الكويت

يوم الدستور

بالدستور نعيش حياه كريمه ...فخلونا نحافظ على هذي الثروه

دستور الكويت من أرقى وأهم انجازاتنا الشعبية .. وانتهاك روحه ونصوصه أوصلنا لما نحن فيه من ضياع وتخبط وفساد وتطرف. حريتك الشخصية وحرياتنا العامة وحرمة منازلنا وأموالنا العامة ومستقبلك ومستقبل أبناءك كلها أمور ما كان لها أن تضيع لو أننا احترمنا والتزمنا بدستورنا العظيم.ندعوك أنت وأسرتك وكل من يحب الكويت للاحتفال بذكرى توقيع دستورنا .. لعلنا بتجمعنا هذا نسمع أصواتنا لمن يملكون قرار صيانته.نرجوكم الدعوة والحشد عبر كافة الوسائل المتاحة.. ففي عددنا ووحدتنا إعلاء لصوت الكويت

11-11-2008

الساعه 5 مساءا بساحة الاراده

شاركونا الامل .... لوطن اجمل بكثير

الشكوه لله

مو قلنا لا تجاملون على حساب الديره !!؟

علشان جم واحد بدون بس والديره باللعنه ما تهمكم؟؟؟

حرام اللي يصير فيها والله ... بس الشكوه لله

لا تجاملون على حساب الديره

اولا اسف على التأخير بكتابة المواضيع وادري انه امور ساخنه صايره بالديره بس عذروني على التأخير ..قبل لا اكتب عن رأي المتواضع باستجواب رئيس مجلس الوزراء احب ان اشيد بمعرض تجمع صوت الكويت .. فعلا الشباب الكويتي بخير .. ابدعتوا وصج حسيت انه راح يكون الوطن أجمل بكثير بالمستقبل القريب

الديره والوضع السياسي بالبلد اصبح على صفيح ساخن مثل ما يقولون , وما أدري ليش؟؟ بس يعني علشان تقديم النائب أحمد المليفي استجوابه لرئيس مجلس الوزراء؟؟ عيل وين الديمقراطيه والحريه اللي تنادون فيها وتتكلمون عنها وتتباهون انكم تطبقونها؟؟؟ هل صعود رئيس مجلس الوزراء الى منصة الاستجواب خط أحمر فعلا؟؟ هل تصريح بعض النواب بأنه الوقت غير مناسب الحين كلام منطقي؟؟ شنو تبون يصير فينا أكثر من جذي؟؟ ليش سوينا انتخابات عيل؟؟

ليش عندنا سلطه تشريعيه ورقابيه ؟؟

ومتى الوقت المناسب؟؟؟

يمكن ننطر شوي لما تكون البلد بخير .. والاقتصاد الكويتي والبورصه تمام , أو لما المشكله الاسكانيه تنحل والكويتي لما يتزوج يعطونه البيت مع فلوس المهر من بنك التسليف , او لما التربيه ومخرجات التعليم تكون على مستوى راقي والوعي الثقافي عندنا يكون عالي وتنمحي سالفه الطائفيه والعنصريه والقبليه والمحسوبيه والواسطه , أو يمكن الحراميه الكبار يحاسبونهم بالأسم , او يمكن ناطرين لما ترجع الرياضه الكويتيه للحياة وما نكون مجرد ورقه بيضاء , وتنحل مشاكل الصحه والبدون عندنا يعيشون وماخذين كامل حقوقهم الانسانيه ويكون عندنا خطط مستقبليه واضحه ومشاريع تنمويه وحيويه تنهض بالبلد ونرتقي

خلاص عيل مدام الصعود خط أحمر .. رجعوا ولايه العهد مع رئاسه مجلس الوزراء وفكونا

بوأنس .. لا تتراجع فالوضع لا يسمح بالمجاملات على حساب مصلحه الديره